CorseCurteAvrîl#09 – Cjadenis

#09 – Cjadenis

In prin la Tiere e jere un puest salvadi dominât des bestiis e besteons.
Inta chê volte la nature e imponeve il grant sul piçul: cuistion di paleontologjiche cjadene alimentâr.
Tant par intindisi, cul benefici di inventari, il pantianon al stave platât inte busone sot de cise bocognone par scjampâ dal gjaton che al voleve brincâi la code.
Il gjaton al sgarfave jenfri chel berdeon, cjalantsi però lis spalis dal cjanon in vuaite dì e gnot par fâi la fuee.
Intant il leonon al spietave il moment bon par poiâ lis sôs çatonis sul cjanon e fâ il paron.
E dai vuê, dai doman, il patatrac al è capitât: il gjaton al à fat fûr il pantianon, il cjanon al à fat il pêl al gjaton e il leonon cul cjanon al à fat pastin paston.
Po, passût e sodisfat, il grant felin si è distirât a gjoldisi la digjestion.
Ma dut chel strani cidinôr a colp, al sveâ il dragonon durmient tal vulcanic cjadinon e… si sa cemût che chê ete e je finide.
Di bon che, a planc a planc la vite su la Tiere si è ripiade e su besteons e bestiis a àn cjapât pît i oms.
Dut un altri vivi alore in cheste ete?
Beh, tantis robis tai milenis di sigûr a son cambiadis, mo in miôr, mo in piês, dipent dai ponts di viste, e vuê il Mont, se no propit un biel zardin par ducj, nol è nancje il puest salvadi di une volte, ma la cjadene alimentâr cul grant che al cope il piçul che, puaret, al cîr di doprâ la sgrimie par salvâ almancul lis orelis, e je restade simpri chê. Dome che cumò, al ven plui naturâl clamâle cjadene militâr.
Staie forsit vignint indenant une gnove gjenie di bestiis?

di Rosute Pelote
#1240

3 coments On CorseCurteAvrîl#09 – Cjadenis

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît