CorseCurte#11 – Migrazion

#11 – Migrazion

Lis gjeometriis segretis no si rompevin al traviersâ lis colonis di fum e i tremôrs dai sclops.  Nancje lis sirenis e i berlis di agonie.  A jerin une vore sot e no interferivin cul segnâl che cuntun craçâ slis al dave la vuide, juste logade intal vertiç dal scuam.

Ma il puest dulà nidiâ nol comparive. Grandis dunis di cinise a cuvierzevin dut fintremai al orizont.

Indevant, indevant, alis par sù, alis par jù. Continuâ. Orientâsi: cirî la lûs zale e grande intal grant celest o lis piçulis e blu intal grant neri.
Disot: nuie vert, nuie aliment. Nuie aghe. Nome flamis, cjalt e cuarps brusâts.
Resisti. No restâ indaûr, no sbassâ la altece.
Il svolitâ al jere tant e simpri plui flap. Ma, cul ultin sfuarç, a rivaran dulà che al è ripâr. (lu san di simpri).

Finalmentri, e comparìs une lûs taronde e rossite indevant, ma invezit dal grant blu, cumò circondade di fum grîs. Il craçâ de vuide al segnalà di lâ alì.
A podevin sorevivi a cualsisei clime e gjeografie, ma no al odi e la matetât (no podevin savê).
No savevin che e jere la ultime migrazion.
No savevin che nol jere il tramont, pûr il fûc da la deflagrazion finâl.

di Vecjo Claes
#1242

1 coments On CorseCurte#11 – Migrazion

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît