CorseCurteMarç#12 – Cumò o voi a cjase

#12 – Cumò o voi a cjase

Brum!… Un sierâsi di puarte come un colp di canon.
E cjape la machine e e partìs, e jê agjitade e alore si met sù la strade blancje dal Ponte Rosso. E cor come une sfolmenade, plene di rabie, jevant sù un polveron… di scjafojâ dute la basse!
– Simpri cussì, simpri cussì!
Sul sdrondenȃ des sospensions che a ciulin te strade plene di busis e cjacare par sfogȃsi come se le ves ancjemò denant dai voi.
– Tu no tu viodis l’ore di sfogȃ la tô rabie su di me, ancje se jo no capis nancje il parcè! E alore ti sberli, e dopo jo o stoi mȃl, e no sai ce fȃ di me se o rivi a cjase cun chest magon che tu mi fasis vignî! E o voi ator come un çus ch’al à cjapȃt un colp tal cjȃf! Ve po che o scassi le machine cumò!
Si è fermade di colp, il motȏr al è muart.
Jê si bute indaûr, e prove a vaî. Nie di fȃ, nancje une lagrime no i ven fûr, a jê disidratade, sute come un scrosop di blave.
Masse rabie.
… Tant e sa ce che e à di fȃ! Chel che e fȃs simpri!
E à di cjatȃ une scuse per tornȃ là di sȏ mari. Sunȃ il campanel, jentrȃ “come niente fosse”, e cjacarȃ di cualchi stupidagjine par podê tornȃ a vê un pocje di pȃs. Lis peraulis no àn impuartance. Chel ch’al conte a son i voi. Un passâ di vogladis, une dȏs trê… fin che si cjalin, mari e fie, come che a àn di cjalȃsi mari e fie. No “di brut”.
Ancje se cualchi fruçon di “brut” al reste tai cjantȏns. Ma dome chel che al è simpri stȃt tra lȏr, e simpri sarà.
E met in moto, la machine e dà doi colps di tos e nuie. E torne a provâ, no, nuie, no va in moto. O signȏr! E cîr il telefonut par clamȃ… nuie, muart ancje chel.
Intant che e cjamine par tornȃ indaûr, viers cjase di sȏ mari, i ven di ridi ancje se e mûr di cjalt e je plene di sêt.
– Bon! Se e veve di sedi une scuse, ve mo une scuse grande e biele… cun tant di roture di balis, però!
Cuant che e rive sot l’apartament di sȏ mari e je strache muarte. Si suie il sudȏr su pes scjalis, e nol covente sunâ il campanel.
Eco sȏ mari che i viarç la puarte, le a viodude rivâ.
E à une biele muse “serafiche” e le fȃs jentrȃ, e cuant che jê e je ancjemò di schene i dîs
– Ti cognòs jo, satu, tu sês mê fie, tu…
– Mame…
E comence a contâ, ma no finìs, parcè che si ferme a cjalâ la taule preparade cuntune biele tace di limonade e la creme di ûf, inte sô scudiele cu lis ocjutis… come cuant che e faseve i agns, di piçule.
– Mame…
– Ti ai dite bielzà che ti cognòs! Dai! No covente cjacarâ!
I berghele daûr, chê benedete femine di sȏ mari.
E alore jê e tȃs e bêf. Intant e pense
– Oh signȏr!… No tacarìn mica a fȃ ancje il zûc dal “Figliuol Prodigo” cumò, eh!?

di Leonore (Motoguzzi)
#1216