Corse Curte e sta par scomençâ…

La Stagjon des Contis e sta par scomençâ, aromai lu savês ben. O forsit no lu savês. O forsit lu savês ma no vês ancjemò capît ce raze di event che al sta par saltâ fûr. E alore… Ve chi, il pont de situazion cun cualchi gnove sul event leterari plui maraveôs e inovatîf dal 2022!

Prin di dut, ise partecipazion? Plasial cheste forme di scriture competitive che e à tant che smicje di tirâ dentri i partecipants par dut l’an? La rispueste no pues jessi che sì! Parcè che o sin inmò ai 23 di Zenâr, e e mancje une setemane interie par podê iscrivisi e mandâ la conte, ma o vin bielzà…. udite udite…. rullo di tamburi… 19! Cuasi vincj scritôrs che a àn decidût di metisi in zûc e divertisi, mandant il lôr NON DI GARE e impegnantsi a inviâ la conte dentri dal ultin di Zenâr, a teme Mascaris.

E di chei 19, la metât e à ancje za scrit, si che duncje, contrari di ce che a vevin pandût, o vin decidût di tacâ a publicâ in curt lis primis contis, di maniere che cui che al à voie di partecipâ al FANTACORSECURTE al podedi ve plui timp par leisi e gjoldisalis dutis. A tacâ di cheste setemane, disìn pûr di joibe, o tacarês a viodi lis contis de Corse Curte di Zenâr.

E par stiçâ chei che a son inmò indecîs, o che a son là che a pensin il lôr non di gare, di mandâ insiemi ae conte (e a son, a son… lu savìn che a son) o vin pensât di dâus ancje cheste anticipazion: la liste dai prins 19 partecipants, che za di bessoi, a leiu, a valin di stâ daûr a Corse Curte! Par cumò lis scuadris in gare a son:

  1. Tapioca City
  2. Passarute
  3. Sbreghebalon
  4. Lupusinfabula
  5. Scalembrut
  6. Sicheduncje
  7. Copasse Blu
  8. La Sforadie
  9. Real Cocâl
  10. Gjaline Padoane
  11. Acuari cence branchiis
  12. Motoguzzi
  13. Volketitrei-Liga
  14. Cuelalt
  15. Stale Rosse di Scodevacje
  16. Borussia Dordul
  17. Atletic Gjatui
  18. Rusute Pelote
  19. Barba Pisul Stentadizza
  20. Sporting Brugnul
  21. Il fi di Marie dal cafè
  22. Cjicechepicjedispicjelacite
  23. Vecjo Claes
  24. Nene Furlane

No sono maraveôs? Cemût podêso sta li a cjalâ cence fâsi vignî voie di partecipâ?! Subit, simpri chi sot, o comunicarin ancje i trê libris che al vinçarà cui che al devent Campion di Invier, ven a stâi prin in classifiche dopo lis Corsis Curtis di Zenâr, Fevrâr e Març. Ma intant, chest ferment nus somee parbon un biel segnâl e o sperin che al puarti ancjemò int, inte gare, che come che o vin dit plui voltis, e somee une competizion, ma al è un gran biel zûc!

E alore, veso voie di provâ a scrivi contis par furlan? Cheste e je la miôr ocasion che us pues capitâ! Ve chi il regolament, ancje par talian, inglês e spagnôl… Us spietìn!

2 coments On Corse Curte e sta par scomençâ…

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît