Lis aganis dal canâl

Gno barbe Giordano mi à contât une storiute di cuant che lui al jere piçul. Une sere tal nestri paîs, Cju di Umil, so cusin, che al jere un frutin di doi agns plui o mancul, al jere sparît.
Sô mari, il pari e la int dal paîs a son lats a cirîlu dapardut. E tant che no lu cjatavin, si scomençà a pensâ che cuissà forsit lis striis i vevin puartât vie.
Daspò di une ricercje di plui di dôs oris e je sucedude une robe strane. A vevin cjatât il frut, tal clâr de lune, parsore di une grande piere di chê altre bande dal flum, cun lis viestis sutis.
Al è stât un fat di no crodi parcè che e jere une vore la distance jenfri lis cjasis in alt e il flum disot. Il frut al jere masse piçul par lâ vie di bessôl e traviersâ il flum e lâ sù chê piere.
Di bot e sclop, la int e viodè trê fantatis cui cjavei luncs e lis viestis blancjis che a cjantavin. Biel ridint, a son ladis vie, saltant di piere in piere pal flum.
Ducj a àn crodût che lis fantatis a fossin lis aganis che a ziravin pe val. Stant che a àn incuintrât il frutin fûr de cjase, e par fâ un scherç, lu àn puartat de altre bande dal flum.

di Cristina Degli Uomini
#1143

Note: Chiout Degli Uomini – Cju di Umil – al è un piçul paisût parsore di Scluse che al è stât sdrumât dal Orcolat tal ’76. Stant che ducj a jerin partîts, nissun al à volût tornâ a fâlu sù. In dî di vuê al è un puest in ruvinis e la int e va a fâ fotos. Achì si viôt Cristina cuant e je lade a cognossi il paîs dai vons.

1 coments On Lis aganis dal canâl

  • Lis aganis e jerin babies par fâ scherçs, a Milie gno paesane i puartavin vie i linzui cuant ju resentave al lavadôr, e dal fat e va a contalu al plevan , chel i rispuindè, che ancje lôr a àn di fâ le dote pal matrimoni. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît