Pôris e pioris

– Ti manìpolin e no tu lu capissis nancje. No stâ fâ la piore, sveiti! Se tu leis la solite stampe tu leiarâs simpri lis stessis bausiis! Ai grancj podês i interesse che tu no tu sepis lis robis cemût che a stan!
– E ce varessio di fâ? Metimi a lei lis tôs cjastronadis e cjalâ i videos che tu mi mandis? A son CA-GA-DIS! Chê altre dî tu mi âs scrit che dai pedofii ebreus controlin il mont… No ti sameie une robe un tic inventade? E la sostituzion etniche? Caz, chê lì e je vecje di secui!
– Pieri! Tu âs di vierzi i voi! A comandâ tal mont a son dai pedofii! Cumò ti cîr il video e dopo tu mi disis! Al è dut sbaliât, corot, fals… Se tu mi scoltassis tu capiressis che lis robis no son slissis cemût che tu crodis. Cemût podistu fidâti di chest sisteme dulà che a son simpri i bêçs a comandâ?
– Ma al è cussì di simpri! Melinde… tu passis masse oris sul telefonut. Bute vie chel sacrabolt, che ti fâs mâl! E dutcâs no viôt ce che a jentrin i pedofii ebreus o i avocâts dal caz che tu scoltis su YouTube, int che di bot e je esperte di dut! Cemût fastu a fidâti?
– E di cui varessio di fidâmi, dai media tradizionâi? I gjornâi a contin balis! O vino di fidâsi dal Stât, che al è brâf e bon? Dopre il cjâf! Tu disis di sì a dut ce che al dîs il Guvier! Tu sês tu che tu leis CA-GA-DIS!
– Jo o soi stûf, no pues plui di te e di chei come te. Cualchi volte o pensi che al sarès di copâus ducj!
Pieri si necuarzè in chel moment di vê passât un limit, ma al provà une strane curiositât. Ce al saressie sucedût a lâ indevant invezit di fermâsi? E intant che Melinde e cirive un altri video, inmagade di un altri incjantadôr, si svicinà. I cjolè il telefonut e lu sbatè par tiere. SBAM! La cjapà pal cuel e al strenzè. No i pareve nancje di sintî i berlis, i rips di riviel, il respîr simpri plui curt. Al gjoldeve e vonde e…
Si sveà, scaturît. Nol varès mai crodût di rivâ a copâ cualchidun, nancje in sium. Ma nol bastave… Ancjemò frescje, al sintive la gjonde provade. “Jo… O soi jo che mi fâs pôre”, al disè, zirantsi tal jet.

di Margarite Cogôi
#1135
Conte cjolte dal Pôrecurte Day 2021

2 coments On Pôris e pioris

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît