La pôre e je fate di nuie

«Uh, uuuuh, ce urlade! Forsit, la buere e sarà stade!
Crr! Crr! Crr! Ce cricament!
Tic! Tic! Tic! Ce ticament!
Ooooh, sac di forment. Mi sint un pecjotament!

Sono puartis? Sono cjadenis?
Si movie la tende? Sivilie il burlaç?

Soi bessôl in cjase, mi sint de pôre cjapât pal laç.

Ooooh! Di pas o sint il rumôr. Oh Diu… mi bat masse il cûr.
Ciùle la bree, il barcon al sbat, come se al fos scjampât un giat.

Salacor, cualchidun volaressie jentrâ?
Ch’al sedi un spirt o un lari o un gnotul çuet?
Drets i cjavei, mi zire il baret.
Strici i voi, strenç fuart lis mans. Fin tai pîts i dêts son ducj frêts.

Rais, moscjins, âfs, gjespis, no steit crodi di cjapâmi par sespis.
Surîs di fogne, stait lontanis. Soi un frutin, jo, migo un formagjin.

Cui isal che mi tocje? Cui isal che mi clame?
Un spirt inbacucât?  Un lôf imberdeât?  Un brigant inçopedât?

Sì, lu sai che la pôre e je fate di nuie, e pûr volarés cualchidun che mi fevelàs, che mi disés che al è dut a puest. Che mi stoi dome insumiant.

Crr! Crr! Crr! Ce cricament!
Tic! Tic! Tic! Ce ticament!
Ooooh, sac di forment. Mi sint un pecjotament!

Po, eco, velu li, il drame.
No vuei sta bessôl, o clami la mame.
«Mame… mameeeeeeeeee».

«Ninin il gno frut, âstu vût pôre? Ma… ma, al jere dome il giat Vilût, che tornâ a cjase al à volût».

«No soi fifon, no soi paurôs. Savevi che al jere lui, ma, distès, a cjase no vuei sta bessôl, mai plui».

di Pierina Gallina
#1130
Conte cjolte dal Pôrecurte Day 2021

1 coments On La pôre e je fate di nuie

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît