Fra slavaris e stelis

Un cîl dal stes colôr de grave, là che il turchin de aghe si misture al grisulin dal savalon, si jere scrofât su la planure. Nui pençs si ingrumavin tant che coltris di plumis sporcjis parsore des boschetis dal Tiliment.
Passade la roste, Alice e lave indenant framieç lis fueis gnovis dai vencjârs cressûts a ôr dal flum. E cun je al ere Nicola. Si ju viodeve a cjaminâ par oris, lui alt e je picinine, je planet e lui satelit. Dal sigûr la mari de zovine e jere in pinsîr, ma je no veve ancjemò finît…
Claps. Cogui. Concui. Slavaris. E veve tacât di frute a sielziju, inmagade des lôr formis e colôrs: ros rusin, zâl spongje, vert jade. Slavaris tarondis, che a saltavin sul pêl de aghe. Si puedial domandâ a un clap a insegnâti a svolâ?
Alice ju ingrumave tal prât daûr di cjase. Sô mari i cridave viodint chel grum di strafaniçs, ma par je ogni clap al jere speciâl, preziôs. Ancje se no si podeve misurâ in carats, chel al jere il sô tesaur.
Ma la montane dal Tiliment no mene ju dome claps… ve là un fruçon di modon, une sclese di veri colorât, un blec di piastrele cuntun vecjo dissen.
Alice si pierdeve daûr di chês scaiis di vitis scognossudis, pensant a lis mans che e vevin doprât chel modon par tirâ su un mûr, ai pîts che a vevin smamide chê piastrele, al fruiâ dal timp che al staronzave dut.
Nissun si jere maraveât cuant che e veve sielzude la scuele di mosaic. E su la coriere des siet e cinc e veve cognossût Nicola, che al studiave di resonîr. Nicola cussì in scuare, razionâl, e pûr al veve gust di lâ daûr di je pes gravis dal Tiliment, inmagât de sô passion, che i faseve cjatâ tesaurs dulà che lui al viodeve dome il grisum de glerie.
Al tacave a plovi. I doi fantats a corevin viers il puest dulà che a vevin poiât lis bicicletis.
Gotis come perlis a pendolavin dai riçots di Alice. “Vûstu viodi il gno puest segret?”
Insom dal prât, i claps no jerin plui: Alice ju veve fruçonâts in mil tocuts par fâ un grant dissen. Te piture e veve metût lis stelis des flabis di cuant che e jere frute, lis capis dai mârs lontans che e varès viodût un dì, e mil liniis fantastichis cun dentri il polvar indorât dal avignî. Nicola al cjalave incantesemât, intant che il cîl si sclarive parsore di lôr…
Alice si distirâ parsore dal mosaic come suntun tapêt, e e slungjà il braç viers di lui par invidâlu a fâ compagn di je. Ce strani, ancje se al jere fat di clap, no si stave discomuts li parsore…
“Cjale, Alice, une stele!” Piçule come une semence di lûs, e sbrissave ju viers la grave, e la fantate daurman e pensà un desideri.
Un bisibili fra lis fueis… Sot di lôr planc planc il mosaic al tacave a vibrâ, ad alçâsi un fregul di tiere, a velizâ lizêr parsore il flum che al slusive sot des stelis, slontanantsi simpri plui svelt de rivis e boschetis che e cognossevin cussì ben.sa
Un viaç maraveôs al jere a pene scomençât, ma Alice no veve premure di viodi dulà che le varès puartade: e voleve gjoldi ogni moment, ogni emozion, cence pierdi nancje une, svolant come slavaris.

di Astrid Virili
#1139
Conte tierce classificade a Vôs de Basse 2021

1 coments On Fra slavaris e stelis

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît