Ce che al reste

Insome, si cjatavin a cjoli aghe di bevi, chei doi, intune cjalde dì di setembar. Il cimitieri al jere il puest plui indicât, risierve indispensabil par ogni ciclist che nol vedi voie di fermâsi a cjolile intune ostarie.
Il puest, di rive jù rispiet a la strade, al veve une biele muraie in stîl avonde antîc, cun toretis, cualchi tombe dute stuarte, i solits sborfedôrs dongje de fontane, o dai bidons di amorbident, la scove dute fruiade, un seglot di plastiche. Al jere un biel puest, ospitâl, e biele e jere la zornade. Toni al domandà: “Ma seont te, la cussience di ducj chescj muarts esistie inmò? Magari di cualchi altre bande…”
“No”, i replicà Pauli, il cinic. “La cussience e finìs cu la muart dal cuarp. Nol reste nuie.”
La rispueste a Toni no i jere plasude pont, ma al saveve dentri di se che e jere juste.
Al le li di une des tombis stuartis. E jere chê di un vieli muart a cuasi cent agns. E, juste dongje, ve chê di un fantacin muart a undis. Toni al pensà che no jere une robe juste, che Diu nol esisteve, che l’amì al veve reson. Nol jere nissun serbatori di cussience in nissune bande dal univiers, nissun Diu, no, nissun Diu. La muart e rivave masse a buinore par cualchidun, masse tart par altris. E dopo nol restave propit nuie.
Cun chei pinsîrs tal cjâf i doi amîs a lerin vie, par tornâ tai lôr paîs.

La vecjute e scaturì. No si imagjinave che lis fantasimis e saltassin fûr in plene dì, cul cjalt di setembar. E saveve la storie de prucission dai muarts ai ultins di Otubar, che si ur lassave fûr la bacinele par che a bevessin. Ma no, no in plene dì. A jerin doi oms… come dôs ombris che a un dât moment a cjapavin consistence e a sameavin vignûts fûr di une vecje fotografie… chês dai agns ’50 a colôrs… po si sfantavin e po a tornavin a materializâsi… a fevelavin di alc… de muart… la lôr vôs e rivave come di lontan… prime a jerin li de fontane… po un di lôr al lave li de tombe di Bortul Mian, muart a 99 agns… e infin a jessevin de puarte dal cimitieri par sfantâsi dal dut…

di Checo Tam
#1128
Conte cjolte dal Pôrecurte Day 2021