Ispirazions par Pôrecurte – Fantasiis resintis

Ve chi un altri articul par ispirâ i contecurtârs a scrivi une conte par il Pôrecurte Day, chest colp che nol fevele de tradizion, ma al bute une voglade su lis storiis di chescj ultins secui, in Friûl, che a son stadis, par cualchi timp, une vore nomenadis.

IL FISCHIOSAURO

Il drâc di Timau, al fo ancje clamât. Al jere il 1954 e inte Domenica del Corriere (insieme cuntun articul su Loch Ness) e salte fûr la gnove di chest Fischiosaruso, che al viveve intes palûts di Timau. Plui che viodilu, za tal an prime, si lu sint. Siviladis lungjononis che al pâr dificil che a saltedin fûr di cualchi imprest uman. Si dîs che al sedi un madracat cun alis di gnotul, si dîs che al sedi un mostri preistoric, fat al sta che si scjadene la int e il turism par vignî a viodi cheste creature. Un al va parfin dentri a cjapâlu par saltâ fûr cuntun madracat, che parfin i dà une muardude. Cualchidun al bute varechine te aghe par copâlu. Fat al sta che dopo chel an il sivilâ al sparìs e dal drâc di Timau no si sa plui nuie. Lis lengatis a disin che al jere dut un scherç, ma… cuissà…

L’ALIEN DI MORTEAN

O sin tal 2012 e su la Napoleoniche, dongje de taronde ta chê volte gnove, plui di cualchidun al viôt une creature bocognone. Lis machinis si fermin, a clamin i carbinîrs, i gjornâi… cualchi altri avistament de creature si à cualchi dì dopo. Lis lengatis, ancje chi, a disin che al sedi stât un struç scjampât di une famee che ju veve o dal arlevament di Puçui, pôc lontan, ma tancj altris a son convints che al sedi stât pardabon un Alien. grant passe trê metris, cul cjâf tant che une bale di rugby e aspiet umanoit. Daspò di chest avistament la creature no si è plui fate viodi, a di part inte cjante dai Laip less ness, ma cui aliens no si pues mai savê… e che a sedin bogns o triscj, lu savìn inmò mancul!

LA DAMA BIANCA

Al pâr che a Triest, su lis pieris sot dal cjastiel, si puedi viodi une piere blancje che e à une sorte di forme di femine. La liende e conte che e sedi une fantate dal 1400, copade di un nobil che, daspò di vê bevût un tic di masse, le à butade ju pal sdrup. La femine e à berlât cetant di jessi mudade in piere, e di chê volte, al pâr che la sô fantasime e ledi inmò a torzeon pal cjistiel e di gnot plui di cualchidun le à viodude. Fin che e sta li dentri, bon, ma sâstu mai che e salti fûr di li… Che po, se no je chê, e sarà une altre, come Gjinevre di Strassolt, che tal 1300 e jere stade mudade intune statue di marmul, e varès di torzeonâ inmò tal cjastiel di Vilalte di Feagne.

L’UCELAT

Des bandis di Resie, invezit, al è di stâ atents al Ucelat. Al pâr che al sedi un ucel grandonon, cul cuarp di cjaval, che al è in grât di gjavâ fûr un arbut de tiere cul bec e butatal su la strade, se nol vûl fâti scjampâ. Stant a la grandece de bestie… dificil che al sedi un uciel vegan!

LA MARI DE GNOT

Figure une vore pôc cognossude, ma che e sarès dutcâs ben presinte intes vals de province di Udin, pronte a puartâ vie i fruts triscj. Si tratarès di une strie, o miôr di un spirt che si viest di strie, neri, che al parone ducj i spirts de gnot. La si pues viodi dome di gnot, in forme di une ombre bocongnone e cence forme, ancje se cuant che e comparìs in forme di strie e viest di neri e dut a sbrendui. E cîr fruts e no si sa parcè (nancje jê e devi jessi vegane) e se no ‘nt cjate si fante intune nule di cinise.

E ALTRIS…

Come il poltergeist che al jere a Palaçûl intai agns ’80, li di une cjase che tal ‘800 e jere un macel e dulà che, al pâr par vie di un frut de famee, la massarie e svolave ator pe cjase di bessole e a saltavin fûr scritis sù pal mûr. Presincis che a vevin puartât a intervignî ancje Sindic e Carbinîr, ma nissun al è stât in câs di dà une spiegazion logjiche al fat.

O come tal 1897 a San Zorç de Richinvelde, dulà che in plui di cualchi barufe, i oms a tacarin a muardisi cuntune rabie fûr misure, tant di distacâsi, in cualchi câs, un dêt o fâsi une vore mâl. A coventavin 4 oms par fermâ un di chescj “licantrops” furlans di fin dal secul, cundute che no si mudavin in lôfs e no jentrave nuie la lune plene. Ma i fats des barufis e des muardudis a son storics…

E po, cemût no visâsi di liendis come chê dal Puint dal Diaul a Cividât, o de mascare dal Diaul, li di madone di graciis, o tantis altris storiis di pôre che si puedin… inventâ!

1 coments On Ispirazions par Pôrecurte – Fantasiis resintis

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît