Pieri si volte

Pieri al jere un om di scjarsis peraulis, si pûr justis; un furlan solidari, simpri pront a dâ une man e no dome, par solit al lave plui in là de sô dote metint il cûr in situazions scalembris che a cumbinavin chei che lu cercenavin inte sô ostarie.
A dî il vêr chel puest lu veve cjapât sù un an indaûr, de bande de so barbe cuant che al veve sierât i voi. Cul scjavaçâ dal timp, chel puest al jere deventât no dome un maneç dulà cjatâsi, dulà bevi alc daspò di une zornade di fadie. Par cualchidun al jere saltât fûr un lûc dulà cjatâ aiar, dopo une rive dure a nivel personâl.
Passât il timp e tirant fûr i conts, l´ostîr al à tacât a inacuarzisi che i clients a lavin al mancul, chei che si congjedavin de ostarie daspò di vê domandât un consei, une volte che il probleme al jere sparît, no tornavin plui in cantine. A chest pont al veve tacât a meti in dubi la sô ande in confront dai siei spindidôrs, e al veve pensât: “la prossime volte Pieri si volte, chei che a comparissin cuntun probleme, no je colpe mê”, sì.
Daspò di un ciert periodi dopo vê cjapât cheste determinazion, Pieri al veve vût un incident stradâl e al jere lât a finîle in ospedâl; nuie di grivi, purpûr lu vevin lassât cualchi dì in osservazion. Cul orloi de bande sô, si jere metût a cjalâ ator e al veve scuvierzût che al jere intun puest che al someave ae sô ostarie. La int e lave in chê struture cun problemis, i dotôrs ju justavin, e tal câs che al fos lât dut ben no tornavin plui.
Chest fât lu veve indreçât a incjolisi che, salacor, il so gnûf mistîr nol fos dome chel di ostîr. Si veve ancje visât che la vite i veve assegnât un rûl in chê societât e che la sô buteghe e veve cjapât sù un rûl sociâl, in chel piçul borc.
Cjapant cussience si jere rigjavât: “la prossime volte, Pieri ti scolte”, sì.
Dedeade a dutis lis ostariis che a àn un rûl sociâl, soredut ches virtuâls.

di Lenart Gjavedon
#1108