Contis di pandemie – Libar


Libar, dutis lis buinoris si domandave: ce zornade ise vuê? A dî il vêr nol impuartave tant savê, za che, cu la pandemie dutis a vevin il stes colôr. Dì daspò misdì al riviodeve la muse di chê realtât che lu obleave a fâ dai cambis radicâi, cambis che bielzà a jerin impussibii di sostignî.

Cuant che si sveave al tornave a sierâ lis palpieris cun fuarce, cirint di meti i pinsîrs in blanc, no simpri al rivave al obietîf, al voleve indurmidîsi di gnûf, par tornâ in chel mont oniric pene lassât, al ambive a riviodi sîts e personis cognossudis in altris timps. A jerin des aparencis legris e gaiarinis, che lu strissinavin intun gorc di emozions, stuzigantlu a partecipâ in diviersis e a voltis stranis situazions, pierdintsi daspò tai lôr meandris. Cence mascarutis, cence distancis e cence normis, libaris come un soflâ di tramontane, come nûi gaiôs a levin scorsenant formant figuris bucolichis.

Lui al pensave che la pandemie e fos une vuere imbastide intun laboratori tra curizûi e tubets e che il nemì nol fos un aversari visibil, ma ben si un antagonist invisibil; di lui al saveve ben pôc, invezit, al podeve dome spietâsi che, prin o dopo chel maledet virus, lu cjapàs a tradiment cuntun proietil pierdût. Za che Libar al veve vivût e viodût di dongje la vuere tra oms. Al veve sintût il sunâ lancurôs di une sirene in plene gnot, il scjampâ viers cîi vierts a gjambis puartaitmi, scuindintsi des cjaladis dai soldâts forescj, sintî il trai di une metraie e stâ sorepinsîr se cualchidun dai siei nol tornave a cjase. Sì, Libar al veve viodût la musate de vuere, sporcje di frusin e di sanc.

Ma ben altri al passave cu la pandemie.

L’om al spietave cun bramosetât che si fasès gnot, al gjoldeve al pinsîr di pognisi e tornâ a insumiâsi cun chês utopichis  ilusions che lu puartavin a dismenteâ dutis chês violencis patidis in passât e ancje chês di ore presint, a jerin lampadis di evasion e di dineis, forsit un sisteme di difese che lu faseve sintî a salf.

Libar i veve simpri fat onôr al scaramantic non che i jere stât assegnât. Purpûr, ironie dal destin, al veve libertât tai siei siums, ma al jere presonîr de realtât.

di Galliano di Buenos Aires
#1107

1 coments On Contis di pandemie – Libar

  • Biele le conte di Galiano, cun tante realtât intôr, indulà che chest virus al’ à scumbinât dut il nestri vivi, e sôl intai siumps si po vivi le serenitât di une volte. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît