Contis argjentinis cence cjâf (3)

E cheste e je la ultime tornade, dute di gjoldi, di Contis cence cjâf!

Fantasie ferbinte 1
Cetante pôre de miserie a tignirin che al mâr si butarin e intun lûc inospitâl a finirin, a lassarin indaûr chel biel paisaç par un toc di tiere, un toc di siums.

Fantasie ferbinte 2
Vuê o scuen di tornâ dongje a chest lûc che o visiti tai miei siums. Chel che a crearin al è sdrumât, o soi tant che lôr, daur di une fantasie ferbinte.

di Cecilia Liva

Serade musicâl

• Cuant che al jere za vistût cun chê cjamese blancje e si jere fermât denant di ducj, lis sôs mans a scomençarin a movisi intun mût armoniôs.
• Chês vôs specials si inserivin une suntune altre interpretant une uniche e maraveose opare.
• I voi e la grande concentrazion dal public a vevin fat tornâ al côr la bielece ricevude.

di Sandra Moro

Il Timp
Il timp nol si piert, neancje si bat, dome al sucêt. Distès che tô presince dome casuâl.

Il Pinsîr
Cuant che o viôt dentri dal so pinsîr o ai capît che o jeri jo. Il plevan mi à dât il perdon.

L’istès
Nol è distès il delincuent che il virtuôs, chel che al robe che l‘onest; ma sì a son l’istès l’arbul e la cuarde.

di Daniel Ghidina

Picinine
Ven ca picinine! La mignestre e je cjalde, mangje sù dut! Dopo ti tignarai intai braçs…

Cence cjâf
Puarte vie il tacuin! No stâ dismenteâ la clâf de birosse! Prôpit… tu tu sês cence cjâf vuê!

di Adriana Bures

Scarpets
Fîi sù e jù che a ricamin lis stofis neris. Fîi sù e jù a sfilin lis nestris stelutis alpinis. Fîi che a fan magjie intes mans de Cesarina.

Detulis di mê none

1- Campe cjaval che la jerbe e cres.
2 – Nol è Crist in crôs, e je une piore.
3 – Vuê si mangje lenghe di canarin.
4 – In bocje al lôf!  Crepe!

di Andrea Ventriggi

Daûr la corint
“Ducj a van daûr la corint… ma chei che i van cuintri a deventin personis ecezionâls”.
Prin che o podedi spiegâlu al polizie stradâl, mi à metût une multe.

di Bruno Vuan