Lets in Ostarie: Balade pai timps di ploie

See the sky about to rain – Balade pai timps di ploie

di Gianluca Franco

CE LIBRI ISAL?
Al è il libri che al à vinçût il 41sim Premi San Simon, lunc 116 pagjinis (14€).

MA CE ISAL DENTRI, DI PRECÎS?
Diferentis storiis che si incrosin, o miôr, di dividin e si incrosin, stant che te vite si fasin sieltis e o sin noaltris a determinâ la vite che o varin. Soredut Bastian, curidôr che une vite e podarès meti di front a une cariere di ciclisim, e une altre vite, a une di paraciclisim. O pûr Agnul, che si è cjatât di front a sielzi se butâsi intun fûc par cirî di salvâ dai fruts o mancul. L’autôr al è il nestri contecurtâr Gianluca Franco, che cun chest romanç al vinç il premi pe tierce volte.

MA CUI ISAL L’AUTÔR
Gianluca Franco lu podês lei ancje in cheste Ostarie, cu lis sôs contis, simpri ben poiadis. In bande dal San Simon al vinçût une vore di altris concors (Vôs de Basse, Zâl par furlan)  e dispes i plâs tamesâ la storie e il passât par contâ storiis che a partissin di li. Di Re Ricart a lis mumis di Vençon fintremai a lâ a finîle al fat di Petean etis diferentis. O podês cjatâ lis sôs publicazions sul so sît.

A CUI I PUEDIAL PLASÊ?
A ducj chei che ur plâs un biel scrivi e che a no crodin, o a crodin, al destin e a lis sieltis te vite. A chei che ur plasin i romançs curts fats di storiis che si incrosin e che a àn gust di viodi cemût costruî un romanç cuntune struture complese e a plui plans che si incrosin in parêl. A chei che ur plâs imparâ cualchi cantin dal furlan lontan di chel fevelât. E a chei che ur plâs lei bielis storiis e fâsi emozionâ, ancje se ur ven l’ingos.

E SE O AI VOIE DI CJOILU?
Facil. Al è publicât de Societât Filologjiche Furlane e lu si cjate in sede, in vie Manin, e sul sît cence fastidis.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît