La libertât

L’Istât dal 1983 e jere une vore cjalde e ce fastidi scugnî tignî intor la gjachete mimetiche cuant che tu fasevis la vuardie su lis bassis altanis di Sant Zuan dal Templi…
Tu cjalavis une fantacine che e tornave a cjase inte sô vile cuntun motorin.
Juste di gnot si veve un moment di recuie.
Ce tant che ti plaseve la cjocolate de matine e ce bon odôr che a vevin la jerbe e la tele di tende cuant che o vevis metût sù il cjamp li dai Asins e o fasevis lis esercitazions a retis de Tor.
E la vuardie noturne a Monte Costate inte biele stagjon e jere un spetacul. Tu ti voluçavis cuntune cuvierte stelade che e puçave un fregul di naftaline e, sclope in man, tu ti gjoldevis il spetacul de plane, dutis lis lûs dai paîs e chei trens che a corevin bande Trevîs o bande Pordenon…
Insome, a part i prins mês lontans di cjase, no ti jere lade mâl. Amet che, soredut tai ultins timps, tu vevis cjatât bon stâ e la ultime gnot, cu la marcje dai “nonos”, e jere stade memorabil: ducj incuadrâts cence nissun che us comandave, o vevis spaurît ducj, parfin l’uficiâl di pichet che al jere vignût a controlâus e a invidâus a no fâ masse casin.
Cualchidun dal trop di voaltris congjedants al veve tirât par tiere doi falconets e l’uficiâl di pichet al veve preferît tornâ, scuintiât, tal so cabôt al ingrès de caserme…
Bon, dai, ti jere lade ben… ancje masse ben. Lis ultimis setemanis ti displaseve lassâ chel mont… i camaradis deventâts amîs, la sale telex, lis discussions su la musiche, la biblioteche, lis partidis di Risiko, lis libaris jessudis a mangjâ la pize…
Ma alore parcè, ai 15 di Zenâr dal 1984, cuant che ti vevin molât e il porton si jere sierât daûr di te… tu tu jeris tacât a cori, a cori plui svelt pussibil?
Vevistu pôre che a tornassin a clamâti indaûr?

di Checo Tam
#1057

1 coments On La libertât

  • Nostalgjis di nae, che il Checo al à poiât ju cussi ben, che cuasit, cuasit, al tornares indaûr, dopo no si sà se par il ben sta di la dentri, o par i mancul agns che fracavin su le schene in chei timps, une robe je certe e di assolude dominance, fûr di chel porton; LIBERTÂT, che za il titul de conte cussi ben denunce. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît