Tuuut
– Pront.
– O soi Marie. Chê che i à robât la machine. Simpri chê.
– Che si le tegni!
– Le ai puartade lì dal mecanic, cumò e va miôr.
– Che si le tegni!
– Ma nancje par ideis! Un catan dal gjenar!
– Ma nol è à comedade?
– Sì, un tichinin… ma no larà indevant di lunc! Il mecanic mi à dit che no valeve nancje la pene, che a jerin bêçs butâts vie!
– E alore parcè…?
– No son mighe bêçs mei, veh!
– E di cui sono? Cui ju aie tirâts fûr?
– Ancjemò nissun, ma la fature e varès di sedi pronte.
– La fature… a cui…?
– Lui.
– Lui cui?
– Lui lui.
– Jo?
– Sì, veh! Cui senò?!
– Ma ce maniere!???
– La fature le fâs rivâ a cjase doman, sicu che i vevi mutivât.
– Che si le tegni!
– Ce robe, la fature o la machine?
– Dutis dôs! No vuei vêlis!
– Ma nol pratindarà mighe che o pai jo, par une machine che no je mê!
– Che si le tegni! I ai dit di tignissile! Cussì cumò e je sô!
– Ma nancje par ideis! Jo no ai mighe voie di tignî une cragne simile!
– Ah no, eh! Alore… Alore… alore che e sinti. Che e vegni a puartâmale.
– Jo?
– Sì, jê
– Parcè?
– Par sodisfazion. O volarès cjalâle in muse e molâi un pâr di papins di chei che o sai jo, no mo?
– Ah! Ce biel invît! Mai vût un plui biel!
– Ce disie? I parie une buine idee?
– Beh… viodial… come idee e je ancje buine…, ancje se i patafs… propi sabide stade il gno miedi al mi à dit che o varès di evitâju, i patafs.
– Eh? Eh… ce ideone?
– Ma…
– Ma?
– Ma jo no pues puartâi la machine, propi no pues.
– Parcè?
– Parce che la machine e je bielzà li di lui.
– Ce robe?
– Che al cjali pal barcon.
– Beh? No viot nuie, jo!
– Chel barcon che al da su la statâl.
– Ma… no si pues parcâ lì, al è vietât di lunc fûr!
– Juste in pont par chel! No isal un autosocors li, cumò, che al manovre? Che al è daûr a cjariâ une machine?
– Oh sì, ma…
– Che al induvini cuale machine che a son daûr a puartâ vie!
– Mostre di une…! ! ! ! ! ! ! ! ! ! ! ! ! ! !! ! ! !! ! (omissis)
– Mandi, sior Pieri!
di Laurin Zuan Nardin
#1055
