Cemût si zuial? Buse di mieç – Aghe e fûc

Maçute o Buse di mieç
No vin cjatade nissune imagjin adate di meti par chest zûc, ma dome di chês cence lis maçutis, ven a stâi il zûc dai cuatri cjantons, che nus pâr une vore plui sempliç e soredut mancul… trist.
Al reste che si zuie in cinc, suntun cuadri cun 4 busis tai cjantons e une propite tal mieç. Cuatri zuiadôrs a stan tai cjantons cuntune maçute” in man, fate doprant un baston che al vedi in ponte un grop di lidrîs (un çocat?). Un zuiadôr numar cinc al “sta sot”, tal mieç, ancje lui cuntune maçute e un bussulot, e dutun colp al vose: «Buse di mieç!»; al che chei altris a tachin a cori par cambiâ buse e chel tal mieç a cîr di meti il bussul intune buse restade vueide.
Clare che cui che al va a risi di viodisi la buse impegnade dal bussulot al cîr di difindile a fuarce di maçadis che a rivin sul bussulot ma ancje sui sghirets, sui zenoi, sui pîts… e chel altri no si faseve preâ a tornâlis.
Un zûc avonde pericolôs, insome, tant al è che i grancj lu vietavin.
I detais dal zûc a laressin spiegâts di un vieli che magari sal vise, e cuissà che magari cualchidun tai coments no nus dedi cualchi informazion in plui.

Aghe e fûc
Chest zûc lu si cognòs ducj, plui o mancul, ma nol è pericul che i fruts di cumò a a lu fasin inmò e alore miôr contâlu.
Al consist tal platâ un ogjet, magari intune aree definide, e fâlu cjatâ di un che al è stât bendât, che al ven tirât a sorteç- Che altris a àn di judâ cui che al cîr doprant lis peraulis che a van de aghe al fûc, tant che “Aghe, agute, lusignutis, fûc, fogaron, tu ti scotis!” o altris variant inventadis sul moment. Si pues zuiâ ancje cence cuvierzisi i voi.