Contis di pandemie – Leandri


Leandri al jere un fin e passionât letôr di fantasience. Par vie de cuarantene, isolât in cjase sô, al veve une vore di timp pai siei fumuts, ma, ancje par pensâ sul inciert presint e sul imprevedibil futûr. Lis zornadis si fasevin lungjis e stufadicis, no cambiavin mai, une daûr chê altre si ripetevin: vuê come îr, doman come passant… e vie indevant. Za no si saveve in ce moment de setemane che si viveve: al podeve sei lunis, vinars o domenie che al jere lu stes. Ognidun tal so cuç si sintive savoltât de situazion e al cirive di gjestîsi a la mancul piês.

Leandri al capive che la umanitât e steve vivint timps stramps. Par moments la sô capidorie no rivave a comprendi la medole de situazion, lu confondevin lis opinions di cierts personaçs impuartants e autorizâts, che di prionte a fevelavin come se stessin predicjant dal pulpit, ognidun bradascjant a so mût, intentant spiegâ chel che lôr stes no rivavin a capî. No varessino vût di metisi ducj dacuardi sul argoment e su lis misuris a cjapâ? Come se e fos une Tor di Babilonie moderni, nissun al capive a di chel altri.

Cuant che Leandri al jevave, dut al jere tal cuâl come îr, si sintive impeolât ta chel visc temporâl di cheste crisi e nol saveve cemût rompi il cercli. Fintremai che une dì..

… une dì al cjapâ lis scjalis che lu puartavin, come che al costumave dî: tal so paradîs. Rivât tal cjast si direzè viers une scansie, li a jerin leâts an par an ducj chei fumuts che al vignive conservant come alc di valôr. Tal viodiju i cambià la cjalade, i siei voi a ridevin di gjonde. La ansie no i permeteve decidi cun cuâl scomençâ. Ae fin al disleà il pachet plui vieli, tacant subit a lei “Il Corriere dei piccoli” , il prin fumut de sô colezion. La sô leture lu ripuartà a sei un zovenut … Sor Pampurio… Il Signor Bonaventura… Daspò cul cressi, Leandri si butâ su aventuris plui ardidis e intrepidis… Flash Gordon, Mandrake il mago, Sandokan il tigre de Malesie, L’uomo ragno… e vie dilunc  ju ricuardave vulintîr a ducj lôr.

E intant che il mont al spietave la magjiche formule che lu varès ripuartât ae sô umane “normalitât”, Leandri, za instalât tal so mont ideâl, al scomençave a sintîsi libar dal opressîf presint.

di Galliano di Buenos Aires
#1026

3 coments On Contis di pandemie – Leandri

  • Biele conte di Galiano, dedite sui moments di duci. Cuant che le vite nus puarte scomponiments disastrôs, nie di miôr che parasi intal rifugi dal passât, sielzint i cjantons miôr, indulà che intal riuç cjantave le aghe clâre cul colôr dal arint intôr. Lussian

  • Bundì Lussian, in chestis zornadis tant strambis e a proposit des tôs peraulis, mi sovignî di chel viers di Lorenzo De Medici . Al à fat ben l`amì Leandri a rifugjâsi tal cjast cui siei fumuts. Ti saludi.

  • Ti doi reson Leandro, i ricuarts de gjovinece son midisine pa vecjaie ” e chi vuol essere lieto sia” disè puar Laurinç

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît