Lets in Ostarie: “Peravali'”

PERAVALI’
Jessût tal 2020, par cure dal grup di lavôr des scuelis dal Friûl di Mieç, al scree la golaine de Filologjiche dediade a I cuaders dal Docuscuele. E je la prime antologjie furlane par scuelis secondariis inferiôrs, ven a stâi lis scuelis mediis, di 127 pagjinis, par 10€ (7 pai socis de SFF).

CE LIBRI ISAL?
Une antologjie didatiche! Ven a stâi un libri di doprâ par lis scuelis, cuntune selezion di autôr furlans di ducj i timps di narative, poesie e oparis par furlan. Il grues dal libri al è pe narative e poesie, plui o mancul in part compagnis, cun 8 autôrs pe poesie e 13 pe narative. Une piçule sezion di doi autôrs le cjatais ancje par lis oparis voltadis par furlan.

MA CE ISAL DENTRI DI PRECÎS?
Si stâ mancul a disi cuai che a son i autôrs tratâts. Pe sezion poesie: Maria Forte, Novella Cantarutti, Pier Paolo Pasolini, Dino Virgili, Leonardo Zanier, Amedeo Giacomini, Federico Tavan, Pierluigi Cappello. Pe sezion narative: Luigi Gortani, Maria Forte, Novella Cantarutti, Andreina Ciceri, Alviero Negro, Riedo Puppo, Dino Virgili, Carlo Sgorlon, Jolanda Mazzon, Franco Marchetta, Paola Lupini, Gianluca Franco, Raffaele Serafini. Pe sezion des oparis voltadis par furlan: Antonio Bellina, Roberto Jacovissi. Ae fin di ogni autôr a son i esercizis di proponi ai arlêfs, prime une piçule bio e ancje un dissen dai autôrs fats dai fruts di scuele.

A CUI PUEDIAL PLASÊ?
Al è un libri di scuele, e la idee di fonde e je di davuelzisi ai insegnants pe lenghe furlane, soredut, ma al è ancje un biel struc di leterature furlane, magari par cualchidun che al vûl vê une panoramiche curte.

DULÂ LU CJATIO?
Li de Societât Filologjiche Furlane, a Udin, in vie Manin, ma si pues cjoli ancje dal sît.