Panolis

«O ai samenât Tritone e mi cjati ben. O ai ancjemò cualchi cjamp di Titano, e tu?»
«Jo mi cjati ben cun Ulisse ma Ciclope no lu met plui, masse besteutis…»
«Pieri Mian si cjate ben cun Saturno… a son panolis grandis…»
«Mah? Jo no mi fidi a cambiâ.»
Ve une tipiche cjacarade a Selvucis tra contadins, a metât agns ’70, cuant che a vevin cjapât pît i ibrits dal consorzio: i catalics a rivavin par pueste a ducj chei che a volevin cognossi lis gnovis varietâts di blave. Lis panolis a fasevin la lôr biele mostre sul sfont blu des pagjinis. Ce biei chei non mitologjics.
In pôcs agns il progrès al jere rivât te cjase coloniche di mio nono… la lavatrice, il scjaldebagn, la television, il paviment cu lis piastrelis in cusine al puest dal ciment e la cusine economiche al puest dal fogolâr.
Cuant che o sint chei non mitologjics alì mi vegnin iniment dome panolis.
Agns dopo a vevin cjapât pît lis siglis alfanumerichis al puest dai dius e semidius olimpics, la strade par Pavie le vevin asfaltade e si jere jemplade di coredôrs a pît e cicliscj.
Cumò no viôt nancje plui, di agns, lis tabelis cul non de cualitât di blave. Cui sa nie ce che a samenin… ta chês braidis, ta chei cjamps invadûts di tratôrs-monsters che a samein simpri plui a cjârs armâts. Il progrès, velu… al continue ancjemò… cui sa dulà che nus puartarà…
A rivaran a produsi blave de grandece di un arbul, cul fust larc come un tronc di agacie e lis panolis a varan un gjen (gene) che lis colorarà in manieris diferentis… panolis grandis come anguriis e che no podaran sedi tacadis di nissun parassît…

di Checo Tam
#979