Une bussade a comant

A scuele, des tantis robis che Ranç mi à scrit e contadis de sô famee, mi impensi cumò, su pai dêts, une o dôs di lôr.
A Scuele Elementâr di Sante Marie, so pari Delchi al veve cefâ cuntune mestre di chês ferbintis, che i disevin “la Capeline”.
Un fat al è che te storie de scuele di Sante Marie a tegnin plui bot te memorie de int lis mestris pevaradis, come une sicilianute che, ancjemò tai agns jenfri lis dôs vueris grandis, e à pacât e spaurît une vore di fruts che, par lôr cont, àn procurât, alore, puarets, di sbrocâsi e svindicâsi sul non di cheste Altabella Giovanna che lôr i disevin par sot Piccolabrutta e Vecchia.

“Capeline” i disevin invezit ae mestre di Delchi par vie de cjapieline saldo fracade sul so cjâf, nancje che fos nassude cul cjapiel intorsi.
Juste une matine che Delchi si jere intardât tal rivâ a scuele, la mestre e veve picjât fûr de puarte une tabele cu la scrite “Bussare!” che ducj abadassin di tucâ te puarte denant di jentrâ dentri, cul so permès, in classe.
“Fuori!” disè la mestre, invelegnade, a Delchi che al jere capitât dentri in premure, cence viodi il cartel e ce che al comandave. “Leggi cosa c’è scritto sulla porta!” disè la mestre, stant dentri, a Delchi corût di corse fûr. Che alore al à let la scrite, al à spesseât a tornâ in classe, a montâ su la catedre, a cjapâ la Capeline a bracecuel e, voiis o no, a bussâle di ca e di là cun tant convinciment, pe pôre che al veve, di riscjâ di discjapielâ la mestre.

CovidCurte day 20 – Conte nr. 6

di Ivano Urli
#966