Il mus di Ustin

Si trate dal mus de mê infanzie. Al veve non Rondelo. E il so paron, Ustin, di chei di Sclopetin.
Di cjase, o di stale ch’e sedi, tratantsi pûr simpri di un mus, al stave tal Cjasut, perni dal nestri curtîl di Jacuç, dut contornât ator ator di cjasis une su l’altre, stalis, cjôts, condots e ledanârs.
Cjapant de place di Sante Marie vie Listize, cognossude de int pal borc Là in jù, il prin puarton a man çampe al jere chel di Mosse e subit dopo al vignive il nestri di Jacuç.
Tal nestri curtîl, bande de strade e tacave la corone des cjasis cun chê di Sclopetin tacade te stanziute di pît sù di Miute, che i disevin “la Maroche” o “la Guziane” e che e jere une strie, tal viodile vecje, dibessole, secje incandide e cul nâs acuilin che i rivave in bocje, poiade su la cjasute misare dal Cuchil cuntun biel puiûl fin su la cjase di chei di Lauçane covade su la nestre di Jacuç e nô su la cjase di Feruzio fin sul ort.
Il puartel dal ort che si slargjave tal soreli, cui strops ben dividûts daûr des paronancis, al distacave cuntun trat graceôs lis cjasis de int di chês dal besteam, prin il cjôt dal purcit di Feruzio, la stale di Jacuç e la stalute picinine di Lauçane, il gabiot de piore di chei dal Cuchil, une scjaipule cun dôs incrudulidis gjalinutis di Miute e bessôl, a mieç curtîl come il soreli, il Cjasut di chei di Sclopetin. Tal Cjasut al jere di cjase justeapont Rondelo.
Cuant che, la sere, Rondelo al tornave di campagne, strac, e Ustin lu dispeave dal cjaruç, il mus si pogneve par tiere su la schene e, cu lis gjambis par aiar, si marcolave tal polvar dal curtîl di contentece, russantsi mo di ca mo di là un trê, cuatri voltis fin che, ricreât, si jevave sù e bessôl al cjapave cul so pas la puarte dal Cjasut, spietant che Ustin i puarti une bocjade.
Il moment plui biel di ogni anade al rivave cuant che, a Sant Antoni, dut il curtîl, ognun cu la sô sporte dal mangjâ, al montave, denant dì, sul cjar di Ustin, cun Rondelo che nus menave a messe fin a Flambri, te gleseute di Sant Vidot che par nô fruts e jere chê di Sant Antoni Pividot.
Si sintivin tancj rumôrs e sunsûrs, di int e di nemâi, tal nestri curtîl a ogni ore, ma la vôs plui clare, fuarte e gaiarine e jere simpri la rontade di Rondelo. Nome une trate, le à superade di adalt la cheolade di un pampagâl puartât di Bepino Sclopetin dal Venezuela. Il pampagâl al fevelave come un om.
“Provino, Provino, tu sês cjoc!” al cheolave de tirace al puar Provino Lauçane tal curtîl.
Alore Provino, a sintîlu, al porconave… Alore il pampagâl, a sintî Provino, al porconave ancje lui ad alte vôs che lu sintivin porconâ fin in place e a Bepino i à tocjât dâlu vie in premure.
Tant che, graciant Idiu, si à tornât a sintî tal nestri curtîl la vôs consolant e nostrane di Rondelo.

di Ivano Urli
#960

1 comment