No si po pratindi la lune…

O ai cjatât une biele sistemazion ta chest paisut de Cjargne cumò che il Mâr Adriatic al rive fin a Osôf. O vîf cu la famee e no ai rognis; juste cualchi batibec cun Sen-Ciù parcè che lis sôs cjavris a vegnin a mangjâ lis jerbis dal gno ort. Une dì, sustât, i ai dit di tornâ tal so paîs.
O podevin sveâsi prime.
La zovenute che e predicjave sul riscjaldament de Tiere za tai agns ’10 e je muarte un an fa: e jere none bisse!
A ogni mût, il guvier comunist de Europe Unide al è avonde bon. Di cirche trente agns che al è al podê al à fat la robe juste di meti lis nâfs di vuere tal Mediterani par no fâ rivâ plui int.
Mi lamenti un pôc des scossis di taramot cumò ma o ai la cjase antisismiche. I studiôs dai taramots a disin che e je la Afriche che e sburte cuintri la Europe.
O ai di preparâ lis stanziis par gno nevôt e la sô famee che a rivin cul avion al aeropuart di Tumieç. A àn vût un permès speciâl dal Ufici de Imigrazion par vignî a cjatâmi. Francis, la sô femine e i fîs a rivaran doman, ai 15 di Setembar dal 2099 de citât di Kano – Nigeria, 30 milions di abitants. Mieçs a vivin su cjasis a palafite e mieçs su barcjis.

di Checo Tam
#947

3 coments On No si po pratindi la lune…

  • Spessis voltis il Checo si divertìs a diti robis cul so mût di doplâ il sens a le sostance, e al rive cussi ben che nissun sa di ce bande ch’ al sta il mani de manarie. Jo no mi clami Noè, ma o stoi preparant une arcje cun cuatri breis posto che il mâr Adriatic al larà a cjareça Osof

  • A veis di perdonami le dismentie dal non sul coment culì disore, ma ce voleiso fâ i carnavai mi stan fondint chei intorcolaments che si cjatin sot le coce craniche. Lussian

  • Apperó! Ce viaç tal avignî! Ta un di chei pussibil, amancul….

Scrîf un coment

This site uses Akismet to reduce spam. Learn how your comment data is processed.

Site Footer