L’infet

A pene finide la ultime vuere, a Luvignà di Sot al nas un fat grâf; une biele dì al sbroche l’infet. Al tache un vecjut cun la fiere, alte simpri di plui e po in trê dîs al mûr. Daspò un pôcs di dîs i tocje a une vecjute; fierone di no crodi e po e mûr ancje jê. Po a tachin a murî ancje oms, feminis e fruts e la int, disperade, no sa ce fâ. Il miedi dal Comun po, nol rive a capî di ce che e mûr la int e cun lis medisinis che al à nol rive a fermâ l’infet e no si da pâs. Stant che in tai paîs dongje la int e stâ ben, la colpe di cetant malan è je di sigûr a Luvignà, al pense, e po sintude la vôs de int che e dîs che la aghe dal poç, in place, e à un odôr strani, al proibìs a la int dal paîs di bevi chê aghe. Cussì la int e scugne lâ a cjoli la aghe cun la bote intal paîs dongje e l’infet al pâr fermâsi. Ven a stâi che cualchidun si vise che in paîs e vignive a cirî une vecje puare, e par vie che e jere masse insistente a domandâ la caritât, la int par plui la mandave vie cence dâi nuie. Di sigûr devi jessi stade une strie che par svindic e veve striât il poç, cussì si clame il predi a benedîlu. Nuie ce fâ, la aghe e puce ancjemò e nissun si fide a bevile. Une biele dì, un zovenot che al è cognossût par jessi bulo e cence pôre di nuie, al decît di lâ jù intal poç a viodi. Si fâs calâ dai amîs cuntune cuarde e cuntun fanâl a carburo in man al va jù. Al è mieç paîs a viodi. – Cuissà ce che al è la jù – e pense la int cul cûr in man. – Chi al è alc! – Al zighe il bulo dal poç. – Tiraitmi su! -. La int, curiose, no viôt la ore di savê di plui e e murmuie – Cuissà ce che al à cjatât! – Cuant che il zovin al jes dal poç al à une robe nere in man e la int si fâs dongje par viodi miôr. La robe nere e somee une bestie, ma ce bestie ise? E je mieze fraide ma si viôt ben che e à la code e lis talpis une vore lungjis e un mustic in fûr che no si capìs ben ce bestie che e sedi. Il mestri dal paîs, che al jere ancje lui a viodi, al sbroche: – Ma e je une simie! – Une simie? La int e je scaturide e no sa spiegâsi cemût che la simie e sedi finide intal poç. Di sigûr lis simis no vivin di chestis bandis.
A chest pont l’ostîr si vise che, mês indaûr, al jere rivât un circ in paîs. Al jere un circ une vore piçul e di puare int, che e lave ator pai paîs juste par jemplâ la panze. Il pari al faseve un pôc di dut, dal mangjefûc al domadôr, e lis dôs bestiis che al veve, magris e spilucadis, si viôt che la vevin curte cul mangjâ. La mari, pôc vistude par fâ movi il sanc ai oms, e saltave su la cuarde e i fruts, vistûts di paiassos, a cirivin di fâ ridi la int. Chescj dal circ a devin jessi stâts pôc contents dal magri incàs dal spetacul, e par svindic di sigûr a vevin butât intal poç cheste simie, forsit muarte di fan o di alc altri.
Cumò la aghe dal poç di Luvignà e je tornade buine.

di Pauli Jacuz
#934

2 comments