Oh mein papa

Te mê cjamare al è un strani lampadari: une sfere fate cul spali.
Te sprolungie che e ven jù dal sufit al è un toc di nastri adesîf blanc. Mi ricuarde me pari.
Me pari al lavorave prime che i vignìs il mâl brut.
O vin sblancjât la cjase insiemit.
Cumò nol po fâ nie: paralyzât… al à bisugne di dut.
No ai voie di viodilu cussì.
O ai voie di ricuardâlu cuant che al jere plen di vite.
Lu ai perdonât par chê volte che mi veve tirât une çavate in muse e mi veve fat sanganâ.
Lui ai perdonât par dutis lis voltis che mi à umiliât disint che o stavi cjase sierât a pierdi timp invezit di lâ ator cui amîs. Amîs? Bulos ignorants che a spacavin i cartei stradâi e che cuant che si zirave cui motorins ti lassavin simpri indaûr.
Lu ai ancje perdonât par chê volte che mi veve dât un fuart pugn tal braç.
Il so respîr si sint par dute la cjase.
Aromai al mancje pôc.
Sì. Mi vegnin ogni tant dai istints di autodistruzion ma dopo o pensi simpri a lui e mal imagjini.
Mi dîs: “Tu âs ancjemò tantis storiis di contâ… cjalâ il cîl, l’orizont celest intun dì seren e ancjemò une volte insumiâti.”
Te mê cjamare al è un strani lampadari. Une sfere fate cul spali.
Il nastri blanc mi ricuarde me pari.
Chê dì che mal à metût sù si e taiade la man cu lis fuarpis.
Al sanganave.

di Checo Tam
#921

3 coments On Oh mein papa

  • La veretât e je che a fuarce di lei lis contis dal nestri Famei che nus somein fûr cu la cassele, forsit si dismentein che al è persone e scritôr di grande sensibilitât. Cheste e je une di chês contis dulà che cun pocjis peraulis al rive a incuadrâ un sintimenti, e meti poesie e dramaticitât dentri un ricuart che ae fin, impussibil dineâ, e je leteradure curte di valôr. E no o sin contents che al sedi il nestri famei.

  • Culì il Checo al vîf il presint cui ricuârts in bielece dal timp di îr, che tant al jude a vivi le ore, massime se son pastanâts sui propits cjârs di cjase. Biele conte metude ju cun tante dedizion di afiet viers il gjenitôr. Lussian

  • Checo, bielissim. Lis tos peraulis mi àn fate emozionâ.

Scrîf un coment

This site uses Akismet to reduce spam. Learn how your comment data is processed.

Site Footer