Ecumène: La colade di Gondolin (J.R.R. Tolkien)

Tuor al è vignût di lontan, lant daûr al svual dai cygnos, ta cheste citât platade jenfri lis culinis. Une citât che e je restade platade par tant timp e Melko, il Vala di fier, de sô sede di Angband, i Infiers di fier, nol è ancjemò rivât a savê alc di Gondolin.
Tuor al cjale i mûrs di piere, lis altis tors de citât, al mire lis scjalis di piere e lis ringhieris e lis cascadis dai riui che a van jù te plane di Amon Gwareth.
E je grande la maravee di Tuor pal sflandôr di Gondolin.
Tuor al ven ospitât dal re Turgon e al devente un dai notabii di Gondolin, sposant la fie dal re, Idril.
Melko al tire dongje un grant esercits di spiis: a son fîs dai Orcui cun voi zâi e verts come di gjats, che a san penetrâ ogni tenebre e viodi traviers de fumate e la gnot; magnis buinis di strissinâsi par ogni fressure e in grât di sintî ogni sbisiament che al coreve te jerbe o sui cuei, e cjans e lôfs e bilitis cun brame di sanc e che a podevin sintî i odôrs vecjos di tantis lunis…
Ju mande ator a cirî Tuor, om scjampât de Tiere des Ombris, ma soredut a scuvierzi la citât dai Noldor scjampâts de servitût.
Lis creaturis di Melko a cirin par agns e agns fin cuant che a rivin a scuvierzi dulà che si cjate la citât. A scuvierzin ancje la Vie di Fughe, Bad Uthwen, la strade che al veve scuviert Tuor par rivâ in Gondolin.
E cussì, ator de citât fantastiche il cercli dal nemì si strenç simpri di plui…
Un traditôr, Meglin, lât a cirî minerâi e caturât dai Orcui su lis culinis e partât a la presince di Melko, al da informazions al nemì su cemût fâ par concuistâ Gondolin.
Meglin al da chestis informazions parcè che al è gjelôs de furtune di Tuor in Gondolin.

Une dì Melko al radune ducj i siei plui brâfs faris e strions, che dal fier e dal fûc a crein une schirie di mostris mai viodûts prime e che no si viodaran mai fin cuant che no rivarà la Grande Fin.
Cualchidun al jere di fier saldât cun tante abilitât che al podeve strissinâ come un lent flum di metal e vuluçasi in spiris intor di ogni ostacul, e dentri ogni drâc al jere plen di triscj Orcui armâts cun sablis e lancis; altris a jerin di bronç e ram e munîts di cûrs e spirts di flame, e chescj a drazavin ogni robe che a vignìs cuintri cun tremendis sofladis o ancje a pescjavin chei a rivavin a scjampâ al calôr dal lôr flât.
Altris ancjemò però a jerin creaturis di pure flame che si stuarzevin come cuardis di metal fondût e a ruvinavin ogni cjase e dongje di lôr il fier e la piere si disfavin e a deventavin tant che aghe: su chescj a cavalcavin i Balrog a centenârs, e a jerin i plui trements tra ducj i mostris di Melko pensâts cuintri Gondolin.
Te citât a stan fasint une vegle noturne. E je la fieste di Tarnin Austa, la Puarte dal Astât.
Il soreli  al è tramontât di là des culinis e la int si è vistude di fieste, cjalant bande Est. Bon, cuant che la lûs e je sfantade e dut al è scûr, un gnûf losôr si impìe intun moment daûr des monts a tramontane e i oms a son maraveâts e la sdrume de int e jere cjalcjade dongje dai bastions.
La maravee si trasforme in dubi cuant che la lûs e cres e e devente ancjemò plui rosse e il dubi al devente terôr cuant che a viodin la nêf montane a piturâsi tant che sanc. E cussì i sarpints di Melko a colin su Gondolin.
Alore de plane a rivin i cjavalîrs cu lis gnovis di chei che a veglin lis vetis da lis monts; a tabain di esercits di fûc e di ombris che a somein drâcs, e a disin: “Melko al è su di nô”.

I mostris a traviersin la  valade e lis blancjis tors di Gondolin a deventin rossis; ancje i plui coragjôs a scjampin, viodint chei drâcs di fûc e chei sarpints di bronç. A nuie a valin lis frecis.
Grande e je la sortide de cjase dal Martiel ‘IrÆ, vuidade di Rog. Dopo vê fat un grant maçalizi di Orcui e Balrog, copantju cu lis macis a vegnin ducj drazâts parcè che a son circondâts e cuintri di lôr al ven mandât un drâc di fûc. La int dal Martiel e ven sterminade dute; ducj a muerin dongje di Rog, il capo e di chê dì cu la lôr muart tante art e maestrie si son pierdudis par simpri.
Un drâc al bute jù la baricade Nord. Dulà che une volte e jere la incjantade androne des rosis cumò e je dome une stradelate scure e plene di rumôr.
Tuor al va incuintri a la bestie, ma al è separât di Egalmoth e al scugne tornâ indaûr fin a mieze place, dongje de fontane. Chi, stracât dal cjalt, al ven butât jù di un grant demoni, ven a stâi di Gothmog in persone, siôr dai Balrog e fi di Melko. Ma ve che Echtelion, cu la muse grise come l’açâl e cul braç dal scudi cence fuarce, al va intor di lui stant par colâ; e il Gnomo al mire cuintri il demoni, ma cence copâlu, ma fasinti dome une feride tal braç. Alore Echtelion, siôr de Fontane, il plui biel dai Noldolis, al va intor di Gothmog propit tal moment che chest al alçe la vuiscje, impirant il pet dal nemì cu la punte dal so elmo; il Balrog al cole e al berle e ducj i doi a van jù te vasche de fontane dal re, che e je une vore fonde. Là jù chê creature e cjate la muart e Echtelion, pesant di açâl, al cole jù ancje lui e cussì al mûr il siôr de Fontane, dopo une bataie ardinte tes aghis frescjis.
Viodint che Gothmog, maressiâl dai esercits, al jere stât copât, il nemì al è plen di pôre e alore la cjase reâl e atache e il re al ven jù dal so tor par combati e cussì a liberin grant part de place, copant un cuarante Balrog e cheste e je une imprese eroiche. Ma a fasin alc di plui: a circondin un drâc di fûc e lu sburtin te aghe de fontane par che al muri. La fontane si inaridìs e si forme un grant nûl di vapôr che al va ator par dute la regjon.
Il maçalizi al è grant e i Gondothlim, i abitants de citât, a cirin di scjampâ. Cualchidun al cîr di rivâ a la Vie di FugÆ ma chi al cjate un dai mostris di Melko, e al mûr brusât.
Tuor e altris a passin a traviers di un passaç segret, a saltin fûr de citât e a van bande des monts, li che e je la Fressure des Acuilis, Cristhorn. Cun lôr al è ancje Legolas Fueeverde, un elf che al viôt benonon. Dongje di un buron e je une imboscade: dai Orcui di Melko a son vuidâts di un Balrog. L’eroic Glorfindel lu fronte e lu cope ma al mûr ancje lui finint tal abyss. Cuant che la situazion e sta lant al piês pai Gondothlim alore si jeve Thorndor, il siôr des Acuilis. Al è nemì di Melko. Al vîf tun nît grandonon parsore di une alte montagne e al odee Melko che i à rapît tancj de sô raze par otignî il segret par podê svolâ. Lis acuilis no orevin e alore Melko ur veve taiât lis alis par cirî di fabricâ un grant pâr di alis par lui e nol jere rivât.
Thorndor, siôr des acuilis al dîs: “Cemût mai chescj orculats di culine si son rimpinâts dongje dal me tron? E parcè i fîs dai Noldui a berlin là jù par pôre de gjarnazie di Melko il maladet? Vignît fûr o Thornhoth, dai becs d’açâr e des sgrifis come spadis!”.
E al mande lis acuilis cuintri i Orcui che a vegnin ferîts e copâts des sgrifis. I Gondothlim a esultin. E di chê volte a àn mitût la acuile come emblema de lôr gjarnazie.

Conte dal 1917 di J.R.R. Tolkien
Riduzude e voltade di Checo Tam

1 comment