Al jere la persone plui cognossude, par dutis lis culinutis, sieradis dentri te cengle da lis nestris monts. Al jere il paron di ducj i cjamps fin dulà che une persone e rivave a viodi. Al steve intune des primis culinutis propit dopo vê traviersât il paîs di Buri, li tu jentravis tai roncs.
A pene finide la plane e juste un tic prime de ultime curve, par chei che a rivavin pe strade statâl, par ducj chei che a rivavin di Gurize, propit a man drete e jere une stradelute cuntun cartel, inclaudât suntun pâl di len, cu la scrite Roccalpiano. A jere une stradelute che a rimpinave la culinute ator ator. Al jere dut un torteon di vignis di ûe blancje cui raputs piçui e rârs, daspò mi an contât che e jere la ûe di vin verduç. Dopo la tierce volte che la plane dal Friûl e restave a la mê man çampe o jeri rivât denant dal palaç dal cont intun splaç che al mostrave dute la bielece di chel cjistiel; nol jere un palaç ma propit un cjistiel. Dute la int ma soredut i siei colonos cuant che lu cjatavin a spesseavin a gjavâ il cjapiel e a saludâlu disint simpri Siôr Cont. Tant al vêr che tante int e scomençave a lamentâsi. Une zornade che no vevi tante premure mi jeri fermât intune ostarie, par cerçâ chel verduç e li o vevi cognossût un dal puest che, o pa la sô insodisfazion, o parcè che al veve bevût un tic di masse, «e si che jo o soi stuf di consumâ la ale dal cjapiel ogni volte che mi cjati tu a tu col cont».
Il Cont nol jere un om alt di stature, ma al veve un bon telâr, di zovin nol veve mai vude pôre di nissun, cumò al veve passât i 80 carnevâi, ma cui cjavei neris come il cjarbon e lis mostacjis cu lis pontis voltadis par sù come il gjenerâl Radetski, al rivave a confondi ce etât che al veve. Ma tai voi, si viodeve dute la fuarce che i deve chel podê che al veve simpri vût te sô vite: e bastave une sô cjalade di brut par fâti restâ fer come imbalsamât, ancje cheste la ai sintude di un dal puest.
La prime volte che o soi jentrât tal so studi, dopo la sô muart, al jere restât dut come che al jere cuant che al jere vîf il cont; i siei erêts no jerin a stâ e a vivi tal cjistiel e cussì no vevin tocjât nuie. Jo o ài vût il permès dal fatôr dai erêts.
O jeri jentrât par la puarte che jere sul splaç denant dal cjistiel e dopo co vevi traviersât dut il salon centrâl e ta la ultime puarte a man çampe al jere l’ufizi. O vevi premure di viodi par dut, ma la bielece di chê mobilie dute lavorade a man in len di ebani, un len come il noglâr nostran dome plui scûr, i dave une impuartance a dute la stanzie e jo mi jeri fermât, ancje parcè che alc al veve cjapât la mê atenzion. Un cuadri cul titul «Nol è nuie di stabil e che al dure par simpri sot il soreli».
Al jere un cuadri, che al mostrave dute la ruvine di un palaç come dopo stât il taramot, ma plui che il destin di ce che al jere sucedût a chê gjernazie, o jeri restât colpît par ce che al jere un cuadri fat cui cjavei intiessûts suntune tele. Tai agns a vegnî al jere sucedût dut come che al diseve chel cuadri.
di Plume di ingjustri
#848
4 comments On Adalberto Daorgnani. Cont di Roccalpiano
E induvinait cui che al torne a cjatânus in Osterie? Nuiemancul che la nestre Plume di Ingjustri! Cuntuen storie di fantasie, forsit, ma che no nus sparagne une riflession e une sorprese finâl, il dut fasintnus respirâ l’aiar des vignis des colinis furlanis.
Di int cussi jere tante une volte, che parons di paîs intîrs e vivevin sui sudôrs de puare int, tancj jerin nobils di animo par davêr, ma tancj nemâi cence cûr , mi contave puare gno mari di un su cheste stirpe, che il dì di Nadâl al ‘à metût sot la nêf une famee di cuindis di lôr, pari, mari, nonos e fîs, cul famôs dit tant usât in forme venesiane ” FORA DAI MIEI COPPI ” sôl pal fat che il nono al jere stât a bruscja une fassine di stecs intal bosc dal siôr par podê scjaldasi le gnot sante. Furtune che dut al è lât a finile come proviodeve il cuadri a fin conte.Simpri compliments a Plume cu lis sôs bielis contis. Lussian
Plume, gno pari mi contave che intun paîs dongje Codroip, cuant che al passave il cjan dal cont, i sotans a vevin di gjavâsi il cjapiel. Viôt tu la arogance dal podê fin la che e rivave. Par fortune che cuasi dute cheste gjernazie e je sot tiere. Al è di dîsi però, che i siôrs di une volte a àn cambiât muse. Cumò no ti tegnin plui a bachete come une volte, cumò ti metin in zenoglon plui in grant, manovrant capitâi cun la finance e butant su la strade fameis intieris; sierant fabrichis culì par vierzilis di là. Jo o speri che prin o dopo al vegni un savoltament gjenerâl e che al cori un pôc di sanc, tipo “La crudêl zoiba grassa”. Ce dîstu?
Mandi
i siors le an menade simpri ben