I purcits da la Moche

Intun paîs dal Friûl di mieç, fin tai agns Cincuante, e à vivût une siore, vedrane e di buine famee. La clamavin la Moche e e jere un pôc strambe; la palacine li che e stave di bessole po e colave a tocs, trascurade di no crodi.
Cheste siore, ancje se i bêçs no i mancjavin, e viveve piês di une zingare; vistîts cragnôs e sbregâts e cjavei sgardufâts che no vevin viodût une piruchire di agnorums. Noaltris fruts o pensavin che e fos stade une strie e no olsavin nancje di lâ a robâ cjariesis intal sô ort, par pôre che nus striàs.
Po ben, cualchidun, che ogni tant al lave a cjatâle, al diseve che  in cjase a ziravin ancje lis gjalinis e che lis scarpis si tacavin tal paviment, tante e jere la cragne.
Dut câs la Moche e veve un grum di passion pes bestiis e inte braide daûr de cjase a ziravin libars doi purcits, un mus e dîs o dodis gjalinis. Nô fruts o lavin dispès a viodiju, rimpinâts sul muret che al confinave cun la stradele.
Une biele dì che la Moche e jere fûr, i purcits, cjatade vierte la puarte che dave sul curtîl, a jentrin in cjase e, zire di une stanzie a chê altre a rivin a jentrâ intal camarin, che al veve la puarte in sfrese. Culì, nasât alc inte bote dal vin, par curiositât a gratin cul nâs il spinel e dài e dài il spinel al salte e fûr vin a fontane. I purcits tal imprin a lechin un pôc chê robe buine e po a tachin a bevi plui che a puedin. Bevût di sigûr un dîs litris par om, a van fûr cul cjâf e vuicant e pocant di ca e di là a rivin a tornâ intal curtîl.
Achì po il cine; par prin a cirin di muardi il mus, che par gjavâsi dal pericul se al ves podût al sarès lât su par un arbul e lis gjalinis, spauridis, a svualin di dutis lis bandis, fasint un casin dal diaul.
Nô fruts, a sintî dut chel davoi, vie sul muret a viodi e a chel spetacul i si tignìn la panze dal ridi.
La storie dai purcits cjocs da la Moche e fasè subit il zîr dal paîs e ancje cumò i vecjos, te ostarie, si fasin une biele ridade, visantsi dal fat.

di Pauli Jacuz

#834