Conseis di scriture: Nick Cave

Il cjantautôr, scritôr e senegjatôr Nick Cave, nassût in Australie tal 1957, al à fondat i grups Birthday Party, Nick Cave & The Bad Seeds e Grinderman. Fra i siei albums plui innomenâts: Dig, Lazarus, Dig!!!, The Good Son, Tender Prey, Henry’s Dream. Di cualchi timp al à metût sù un sît la che i siei fans a puedin fâi domandis, e lui al rispuint. Il sît si clame The Red Hand Files. Nus à colpît ce che al à scrit su la creativitât, nus somee util no dome par scrivi cjançons, ma ancje contis!

A son moments là che la tô creativitât e sparìs, in chescj câs cemût fâstu a convincile a tornâ?

Jo, Toronto, Canadà

Cjare Jo,
La creativitât no je une robe che e pues sparî. L’impuls creatîf nol è altri che la strategjie che si dopre par cjapâ lis ideis. Lis ideis e son dapardut e simpri a disposizion, se si è preparâts a acetâlis. Chest al vûl dî vê une cierte responsabilitât tal procès artistic. A coventin dissipline, rigôr, preparazion. Bisugne mostrâ di meretâsi la idee.

Da râr mi è capitât di sentâmi li dal scritori cun alc altri di dî, che nol fos “O soi pront.” Sentâsi e je la prime robe, sentâsi e jessi pronts a dutis lis pussibilitâts. Dome cussì la idee si sint libare di jentrâ. E jentre piçule e cun esitazion, ma, midiant de tô atenzion in vuaite, e pues cressi e deventâ une vore plui grande. Stâ sentâts e pronts al pues durâ un timp lunc e malcuiet. Ma no stâ a disperâti! No mi è mai capitade une situazion dulà che la idee no acete di fâsi viodi a un cerviel pront.

Intant che tu sês in chest stât di prontece, tu âs di sei la robe che tu vûs sei. Se tu sês une scritore, alore scrîf. Tal imprin, il flus de cussience al va ben. Scrîf cence judicâ e cence condanâ te stesse. Scrîf in mût legri e spericulât. Ancje se chest prin scrit ti somee di pôc valôr, va indevant, parcè che la idee biele si è sveade e e stâ vignint viers di te, jê e e rispuint al to mostrâti determinade.

La idee e je pensade in mût speciâl par te, pe tô unicitât. Se no tu sês li par ricevile, o se no tu sês te stesse cuant che e rive o, diu nus vuardi, tu ti sês mascarade di cualchidun altri, la idee e pues cjapâ pôre e sparî e pierdisi par simpri. Jê e sta cirint te e dome te. Sei te stesse. La idee si svicine.

Lis ideis e son creaturis sforadis, te mê esperience. A rivin come sunsûrs e tu âs di tignîlis di cont in onestât par rivâ a ricevilis. Forsit la idee e je spauride come te. Forsit la idee e je invisibile come che cualchi volte tu ti sintis invisibile tu. Po stai che la idee e pandi il to jessi interiôr, e che e fasi fature a stabilîsi ta un cjâf plen di insigurece, che al ripet il vecjo mantra dal dubi di se. Chestis vôs si puedin parâ vie cuntune disubidience vivarose, une legre sfide. Disubidìs a lis vôs lânt indevant a scrivi. Lôr a son une vore mancul robustis di ce che a somein. La idee si svicine simpri plui.

Alore, Jo, ve ca cualchi consei su ce fâ:
Sentiti. Sei te stesse. Sei pronte. Sei atente. Resist a lis vôs. Sei ce che tu vûs sei. Scrîf. Sei legre. Sei spericulade. Visiti che dome tu tu sês dissegnade par la idee che e sta rivant viers di te. Tu sês brave avonde. La idee e je cuasi rivade.

Mandi, Nick

Conseis voltâts par furlan
de sartore de Ostarie