Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Gjatis
Gjate gjate dute mate
Tire vie chê brute çate
Tire jù la tô lengate
I voi di so nono a parin grignei di rosade intune tiere garbe e grispe.
Come lui al jere ruan di piel, sclagn di tressadure e picinin di altece, ma ferbint e impussibil di mugnestrâ cuant che si meteve alc tal cjâf. E al jere stât propit il vieli a meti intor a Francuti, di canai, chê idee de gjate marangule.
«Tu âs di stâ atent, tal bosc dal Poluduç, di gnot. La gjate marangule a fâs il nît su chei lens e se tu passis sot, ti salte intor e ti si intache tai cjavei!»
«E dopo nono?» al domandave, cui voi discocolâts, figurantsi une gjatate cu la muse di strie, grampade cun dincj e ongulis te sô sassare riçote.
«E dopo nuie! Tu âs di tignitale fintremai che no si stufe! A son besteatis che ti compagnin ancje dute une vite, se cjatin bonstâ».
E Francuti, cjaviestri, vie a cori pal bosc a cirî la creature, profitant de libertât che i lassave la sô famee – puare, ma che la sere e butave ancjemò une cjadree fûr de puarte, par misturâ il cjant di grîs e crots.
A lui, dut câs, a diference di chei altris, une liende sierade daûr dal cerneli si faseve sù tant che il brut timp: nûi di fantasie involuçâts a un vint di estri, a parâ jù folcs di visions che dopo al dissegnave e i si intacavin intor, propit come lis gjatis. Ma no jerin marangulis, chês. Lis mostrave al vieli lant a cjatâlu dopo cene e tossint pe puce dal spagnolet.
«Dome chestis, mi si son tacadis intor nono!» lu stiçave.
E il vieli, che aromai nol cjaminave plui, al sgrasaiave, strenzint tai dêts une gjate spinose, gjavade des braghessis dal nevôt.
«Ancje chestis si tachin tai cjavei», i diseve riduçant di sot lis moschetis, «Âstu mai provât a tirâlis intor a lis fantacinis».
E Francuti, che di frutis nol saveve nuie, al rideve ancje lui, ma al deventave ros tant che un pevaron.
«Ma prin o dopo tu lis cjatis, no sta vê pôre», i ripeteve il vieli. «I vûl dome sperât che tu rivis adore a cognossilis e disbratâti. No come me che lis ai inmò tal cjâf, e nancje cu la naine che ti ai insegnade lis ai paradis vie».
E a chês peraulis, Francuti i scrutinave i cjavei blancs vanzâts, pronts a colâ cence bisugne di aiar. Nol viodeve nissune gjate, ta chê volte, cussì come che no la viôt cumò, te fotografie contornade dal marmul.
E pûr, magari cussì no, rivât dongje ai cuarante, cumò al sa ben cemût che a son fatis lis gjatis marangulis. Ind à plui di une, intor. La idee che nol sedi pussibil fâ de sô fantasie un lavôr, dissegnant fumuts; la idee di vê une ocupazion intun ufici, par stâ plui sigûrs; o chê di platâ il fat che no ti plasin lis feminis, o adiriture platâ il morôs, cence nancje il coraç di clamâlu cussì tai siei pinsîrs.
Gjatis… che ti si intachin intor e a cjatin bonstâ.
Francuti al prove a visâsi de naine… Forsit nol è masse tart.
Alc i beche une cjavile e lu discjol. Si sbasse.
I si è tacade tal cjalçut, ma i bastin doi dêts par gjavâle.
Cardo selvatico, si clame par talian, e nol capìs cemût che al sedi rivât li, framieç de glerie e dal ciment.
2 comments
Lasse une rispueste
Dutis lis contis
Biele!
Di frut o vevi sintût ancjemò storiutis su cheste gjate marangule sot forme su par ju di cheste. Intal plasê di leile mi son tornats ricuarts lontans a rivivi fûr il scansel de dismentîe.Lussian