[…] lezion di ART, dulà che il prof. N. S. nus spieghe e mostre une opare dal mestri Alfredo Pecile…
Torquemada
Ma sêso sigûrs che Torquemada nol è chenti?
Cui?
Torquemada, chel incuisidôr là, chel che al mandave sul fogaron i eretics, i marrans e lis striis e ancje i sacrilics che a dopravin malamentri i ordegns sacris.
Ma se al sarà muart di 500 agns!
No si sa mai!
Ma dai!
Cun chê int li! Sêso sigûrs?
Ma si po! Ma ce jentrial Torquemada?
Dome se mi sigurais che….
Ma sì, ma sì, tal sigurìn.
Alore o pues contâus cheste conte.
E conte la conte!
Alore… e jere muarte Mirie.
Cui?
Mirie. Si clamave cussì. Jo e Tin o jerin zagos intal funerâl, ma zagos di tierce serie, a jerin li dome par fâ numar, il turibul, i cjandelîrs, la aghe sante, dut insome, a vevin dut chei plui grancj. La crôs, po, e i soferâi ju puartavin i oms. Alore, finide la benedizion, i oms a clamin dongje i fruts e ur fidin i lôr argagns di tornâ a puartâju in glesie, che lôr, i oms, a scugnaran ben fermâsi li di Perinut a bevi un cuart e a resonâ di Mirie, puare femine, aie di vê patît? cuissà, però biele etât, magari jo e vie discorint.
A mi e a Tin nus tocje la crôs, lait a planc, par sot, di no fâsi mâl. E vie nô, braurôs, ma no pe strade, no, po! Pai cjamps al è une vore plui biel e si sta mancul.
No nus saltie fûr un jeur, propi devant dal nâs! Cjapilu, cor svelt, no par li, par di là, cjantonilu intal fossâl, li, li, dai! e ju pachis, un pôc a câs, ma si capìs a jerin zovins e po la arme che o dopravin no jere regolamentâr, e jere la crôs, ju pachis e Torquemada sêso propi sigûrs che… sigûrs sigûrs?
Sarà che Crist al si varà ufindût di sei doprât tant che arme maçolante, sarà che al varà vût mior metisi de bande de bestie e no di chê dai umans, o pûr, cui savê! Magari nol è cussì onipotent nancje lui… ma insome… la crôs si à un pôc scussade e un tichinin strambide, ma …
il jeur no lu vin mighe cjapât!
Però nancje Torquemada no nus cjapâts nô!
di Laurin Zuan Nardin
#664
4 comments
Lasse une rispueste
Dutis lis contis
Pauli, altrigo ché Torquemada, s'a lu sa Diane la dee de cjace ch'a tu âs cirût di copâ il jeur cu la crôs, a ti scancele de liste dai cjaçadôrs..
Al anonim di chi sore (Lussian ?), no jeri jo cu la crôs in man.
Par me a puedarès jessi stât Nelo o Galliano, o magari ancje Bepi, ducj proviodûts di confidence cu la pene e di buine memorie.
Jo no ai mai vût la sclope e l'unic jeur che o ai tirât sot cu la machine, mi à rot un ferâl e o ai dovût paiâlu di bessôl.
Mandi buine int.
Pauli no soi jo l'anonim di culì disore.Stant ai jeurs ancje jo ai vut a cefà cun lor come cjaçador,ma no ai mai rivat a copa un, e corevin masse,fintremai ai capit che al jere plui convenient furni le padiele cun chei de becjarie, di provenience argjentine.Daur l'umorisim de conte mi spire aiar di milio dai cjans ? Lussian
Pauli, o jeri jo Bepi chel anonim lì parsore, dismenteât di firmâsi, Bepi