Pieri bausie

Al faseve il cjaliâr e lu clamavin Pieri Trade ma jo, di frut, lu vevi batiât Pieri bausie par vie che no la contave mai juste. Cuant che i tu puartavis alc a comedâ, diu nus vuardi; al someave che tu i dessis fastidi a fâlu lavorâ. Di sigûr ti faseve spietâ almancul une setemane e po al tacave a rimandâ: “No ai vût timp, torne setemane cu ven!”. Po ben, chê ziguzaine e jere buine di lâ indenant ancje un mês. E si che il timp par lâ a bevi un tai inte ostarie lu veve simpri. Al jere plui facil cjatâlu “al Fante” che intal so sgabuzin. Cuant po che al veve suelât un pâr di scarpis, i pareve di vê fat avonde, e cun la scuse che i mancjave un toc di corean, al jere bon di molâ dut, cjapâ la biciclete e lâ fin a Udin, a cjolilu. Pe strade po pedalant al faseve sêt e cussì al scugnive fâ tape a Çupicje, a Visepente, a Cjampfuarmit, a Sante Catarine e po in place Sant Jacum, li che e jere la buteghe pai cjaliârs. Tornant indaûr po, al tornave a fâ tape in dutis lis glesiis li che al veve preât, a tais, rivant di Codroip. A cjase sô la situazion no jere da lis miôr; al veve cuatri fruts di tirâ sù, un mascli e trê feminis e debits un pôc da par dut. Se Anute, la sô femine, no si fos rote la schene a lavâ pes cjasis, a saressin muarts ducj di fan. Pieri plui di tant no si scomponeve e al pensave nome par se. Ven a stâi che une dì, tornant a cjase di Udin, al jere plui zinzirinât dal solit e al lave di ca e di là. Di bot i sclope il budiel di une ruede, che e veve plui tacons che cuvierton, al piert l’ecuilibri e nol vadie a colâ intal mieç de Pontebane! Sarà stât il destin o la providence, che un camion, che al rivave di buride, nol à rivât a frenâ in timp e al à tirât sot puar Pieri, copantlu sul colp. Il dì dal funerâl Anute no à butât nancje une lagrime, anzit, cualchidun al zure di vele viodude riduçâ cuant che e àn metût jù la casse inte buse. Dut câs, chest incident al è stât une fortune par chê famee disgraciade; i bêçs de sigurazion a àn podût sistemâle e Anute e à dismetût di rompisi la schene a lavâ pes fameis.

• 

  Anonimo has written: 16 di Fevrâr dal 2017 at 2:30 DM Rispuint

  Biele la conte, cun chel savor sempliç di pais indula che jere florent le ativitat artesane, cun cetancj personaçs stranis intal fa il lor lavor ma che ben o mal a rivavin a sbarcja il lunari cence pretindi su le socide central.Lussian
• 

  Giovanni Nello Malisano has written: 17 di Fevrâr dal 2017 at 2:30 DM Rispuint

  Pauli, Pieri trade ti aial ruvinât o pierdudis cualchi pâr di scarpis. Di cemût che tu lu âs contade la sô storie al somee propit cussì. Tu le âs contade ben ancje cheste volte.
• 

  Pauli Jacus has written: 18 di Fevrâr dal 2017 at 12:05 PDM Rispuint

  Nelo, nol jere pericul di ve tancj pârs di scarpis. In chei agns, di frut, o vevi un pâr di sandui di corean e un pâr di zocui di len. Chei che a duravin di mancul a jerin i zocui. Dut câs o fasarès subit cambi cun ducj i pârs di scarpis che o ai cumò par tornâ ai timps dai zocui, cun sessante/sessantecinc agns di mancul. E tu no mo?
  Barbara, ti ringracii par lis bielis peraulis; tu mi metis in imbaraç. Forsit chei che mi viodin dal
  di fûr a viodin robis che jo, dal di dentri no soi usât a viodi.
  Mandi