Biel il mût di procedi ma masse tiarmins 'a scugnin vignî riviodûts. (Ostêr, 'o vin di ce cridâ!)
Pepi e lis cisilis
Ogni an Pepi cuant che e rivave la Vierte si meteve a cjalȃ cul nȃs par aiar par viodi rivȃ lis cisilis: come cuant che al jere frut i metevin ligrie e gjonde al cûr. Cun lȏr a rivavin lis bielis zornadis e il clip che al scjaldave i vuès dopo il frȇt dal lunc Unvier.
Pepi, cuntune maluserie dulinziose, al fastiliave viodint che ancjemò no rivavin.
“Dulà sarano ladis?” Al veve sintût dȋ che ogni an ’nt rivavin simpri di mancul par tantis causis. Al sarà stȃt colpe dal incuinament dal aiar o dai disinfestants che a fasevin murȋ insets, moscjis, larvis, che a jerin il lȏr prin nutriment. Une altre cause e sarà stade l’aument de temperature globȃl tant che no rivavin adore a finȋ il viaҫ di migrazion e a murivin vie pe strade.
Ma Pepi i dave parplui la colpe a la cementificazion esagjerade in at za di timp no dome tes citȃts, ma ancje te campagne.
La cementificazion che e veve puartȃt vie tant vert ator e e continuave a lȃ indenant cence polse, intune maniere che lui al definive “ salvadie”.
Par chest cuant che te famee i vevin fat chȇ propueste di butȃ jù la cjase vecje par fȃ sù une gnove par ingrandȋ e rigjavȃ un pȃr di apartaments ancje pai nevȏts, lui si veve cjatȃt cuintri di ducj.
Parcè che chel progjet al puartave vie tant teren, dut il prȃt ator fin te braide, lui nol varès volût tocjȃ nuie almancul fin cuant che al jere ancjemò vȋf. In chȇ cjase al jere nassût so pari, lui e ancje i siei fȋs e cumò si voleve disdrumȃ dut. Chest pinsȋr no i deve pȃs, ma dopo tant scombati al veve scugnût propit cedi ma a une condizion, chȇ di no butȃ jù la stale, parcè che al jere convint che lis cisilis no rivassin plui in tantis come une volte, par vie che planc a planc a jerin sparidis lis stalis, dulà che lȏr, sot lis trȃfs di len, a cjatavin bon stȃ par fȃ il nȋt. Si visave cuant che a rivavin, a zornavin e a sgurlavin ator ator e i fasevin tante companie.
In chȇ stale al veve ancje un ricuart speciȃl, di cuant che al jere za zovinut e cu la sȏ Milie al lave a platȃsi par stȃ di bessȏi. Propit là i veve dȃt la prime bussade, ancjemò si visave di chei voi come stelis che lu cjalavin cun chȇ bocje di ridi e chȇs strecis come sede cui flocs ros, la cotule plissetade e la bluse blancje ricamade. Lui le cjalave cun atrat provant par jȇ une grande emozion e al sintive dentri un bon stȃ cence confront.
E jere la prime volte che al veve provȃt par jȇ chȇ sensazion, di alore indenant no si varessin plui lassȃts.
Dome il nevȏt Stiefin al veve cjapȃt la reson dal nono e al veve ancjemò denant dai voi chȇ sene e no le dismenteave. Cuant che e jere rivade la ruspe par butȃ jù la cjase, al veve viodȗt so nono blanc come il mȗr che al jere lȃt in font de braide a platȃsi daȗr dal morȃr, al veve cjalȃt la sȏ muse, chȇ di un disperȃt. La stale si doveve lassȃ par rispiet dal nono, par ducj i sacrificis che al veve fat e si varès dovût ancje regolȃle come che lui al voleve.
Al jere simpri timp par butȃle jù, ma no cumò.
Al pensave che lis cisilis te stale i varessin dȃt confuart e companie, li cun lȏr il nono forsit al varès sintût la vite mancul grivie e al varès acetȃt cun plui serenitȃt ducj i mudaments. Parcè che Pepi al varès spietȃt simpri lis cisilis che a tornavin te stale, come cuant che al jere frut, e li di bessȏl , lontan dal mont confusionari e trist, al varès sintût inmò plui fuart la pȃs di chel lûc che i parave vie chel marum e i puartave il seren tal cûr.
di Egle Taverna
6 comments
Lasse une rispueste
Dutis lis contis
Biele, e ciame dintorsi chel romanticisim che sol chei di une certe ete e puedin sinti.Lussian
Bundì Egle,
Une storie che nus ripuarte a rivivi senis come cuant che o jerin fruts. Mari nature nus regalave e nus faseve fantasiâ sore cheste emigrazion, che ogni an e vignive spietade, come che i sucedeve a Pepi il personaç de storie. Une conte biele e sintude.
Graciis
a Lussian ,a Galliano pes bielis riflessions. Une storie di ȋr, di un timp pierdȗt che e fȃs rivivi lis situazions che si àn vȗt tal cambiament epocȃl dal mont contadin a chel industriȃl e dal consumisim cun dutis lis conseguencis che al à puartȃt tal ambient e lis trasformazions te nestre societȃt.
Mandi a ducj e Buine Pasche!
Egle T.
Une dì, la uniche inte mê vite, o ai viodût un trop di sisilis pront a partî… a indi jerin un cincuante. Cence pôre, su la ringhiere de mê terace! Ce spetacul! Al sarà stât viers la fin dai agns 90… insome, mi son vignûts i sgrisui! E o ai pensât a trop che o vin di imparâ dai nemâi…
ADN
Biele la conte, naturalmentri… e brave Egle!
ADN
Ancje par me i nîts di sisile sot dai trâfs de stale a fevelavin di Vierte, invezit i fîi de curint cu lis cicaris di veri ducj neris sfodrâts di sisilutis a fevelavin di Sierade…grassie Egle! Barbara