Vuê us contarai un fat sucedût al “barbe ‘Sef”, un personaç furlan che al cumbine simpri une gnove. Vicendis scletis di paîs, cualchi volte scherçosis, altris no tant. Insume un barbe ‘Sef simpatic e uman.
La conte si clame “La purghe”
Il barbe ‘Sef al jere un furlan di altris timps. Lis voltis che si movè dal paîs si lis podeve contâ sui dêts di une man. La ultime e fo cuant che lu puartarin d’urgjence tal ospedâl. Us contarai il parcè: al savè che al jere stât invidât aes gnocis de fie di so copari, a ‘Sef i vignì l’aghegole, cundiplui inte buteghe al veve sintût che il convivi al sarès stât alc e ce, o podês dome crodi, al varès fat une mangjonade di chês, si varès visât di jê par dute la vite. Tal doman buinore al le in speziarie, ducj lu cognossevin e no par sei un client.
– Alore ‘Sef, cemût vadie – i disin.
– O varès bisugne di cjolimi une purghe cumò che e ven la primevere, o volarès liberâ il stomi.
Il speziâr i de une butiliute racomandantji che si cjoledi un cucjarin prin di lâ a durmî e no di plui, za che al jere un purgant une vore infalibil.
– Sì, sì, dotôr, che nol stedi a preocupâsi.
Rivade gnot, si dismenteà de misure e come che al faseve simpri tratantsi di butiliis, le cjapà pal cuel puartantle ae bocje par dai un cluc, dome Diu sa ce che i passà pal cjâf in chel moment, al alçà il comedon fasintle fûr dute, po passantsi la manie de cjamese sore i mostaçs si metè tal jet, sperant che une buine durmide i varès puartât l’efiet desiderât.
Vie pe gnot si sveà cuntun malstâ gjenerâl, inzirli, voie di butâ fûr e tante pôre, che fos rivade la ore di lâ a fâi compagnie a chê cristiane (requiem). Cul flât che al veve al clamà il nevôt; chest, viodint la butiliute vueide al nasà a colp la situazion e cence pensâ masse al tache il puieri al saret, cjariât l’om al partì stimolant la bestie cu la scorie, a rivarin devant dal pront socors tant che un fulmin. A ‘Sef lu ricoverarin d’urgjence, il nevôt al passà la gnot ingnervosit, mo sentât e mo pognet, intune bancje de sale d’aspiet.
Tal doman matine lu informarin che ‘Sef si jere salvât par un pêl, tal colm de gnot lu operarin de apendicite, che si steve butant in peritonite graciis al purgant, che al veve stimolât e acelerât il procès. Cheste aventure e ve il so presi. Il barbe nol podè assisti aes tant bramadis gnocis e al tant suspirât bacanâl gastronomic.
di Galliano di Buenos Aires
#509
4 comments On La purghe
Fos stât miôr che invezit di cjoli le purghe al ves dizunât cualchi zornade prin, ma come che tu disis tu al jere un furlan di di une volte. BIele e divertent la conte. Mi à fat fâ une biele ridade.
Nello Malisano
Di sigûr xche in chê volte si tratave di vueli di ricin e o crôt che nol jere conseât di toilu le sere par vie che l'effiet imperiôs al padeve fâte fâ tal jet o vie pe cjamare tant che tu corevis vie tal ceso:-)
O feveli par sei stât "purgât" cuntune mignestre di fasois invueleade di vueli di ricin insiemit a cualchi compagn. L~i, o tu rivavis tal cesso il prin o tu vzvis di cori di fûr a cjatâti un cjanton libar. Cualchidun come un dai miei amîs,se faseve tes barghessis parce ch'al rivave masse tart. Il dí dopo, parce chi vevi masse ridût di lui mi veve obleât a fâ un round di pugjilât. Inutil dî che si fin chel dí a si si dave pugns par ridi, o ai scuegnût difindimi par no cjapâ masse botis:-)
Galiano biele le to conte, mi à fat ricuarda puar Vigji, al jere a sta tal gno stess curtif, e cuant o jeri frut ji an dat la purghe cul vueli brusat de balilla parcè al veve il cuadri di stalin picjat in cjase.il cesso dongje le stale al'è stat maglat di neri fin passe dopo vuere. Lussian
Il biel dai coments al è che a voltis si trasformin in complements de storie. Une zonte che cence pretesis di modificâ l’origjinâl i da ae conte e al contadôr altris pussibilitâts di disvilupâ altris temis.
O salût a Nello, Yaio e Lussian par vê partecipât cui lôr coments.