Cui sa ce motîf che al jere… tu stavis intal scûr inte tô cjamare intal 1977, disore dal Bar dongje de Pueste a scoltâ la filodifusion de RAI; la gnot, une gnot di cui sa cuâl mês… e dopo vê ricognossût “La pulce d’acqua” di Branduardi ve che al jere rivât un toc strumentâl… come une colone sonore di un cualchi film… e tu ti imagjinavis lis sirenis che a cjantavin a Ulisse, cui sa parcè… al jere un coro di oms… ooh, o-o-oh, ohò… cussì al faseve… ma sì, come une cjançon di marinârs, marinârs antîcs…
E agns dopo, tancj agns dopo, intune cjançon dai Tenhi, complès finlandês che tu cognossis dome tu, tu vevis respirât la stesse atmosfere di chê gnot di tancj agns indaûr… sì, dai, no jerin lis stessis notis ma al jere alc in comun tra il motîf de gnot dal ’77 e il toc dai Tenhi…
E dute la musiche che tu vevis scoltât… e che tu vevis sunât… e lis cassetis, i long playing, i cd… e “Dear Prudence” dai Beatles reinterpretade di Siouxsie intune gnot stelade dal 1983… tal casson dal camion di militâr durant une manovre…
Se no fos esistude la musiche… ce brut mont che al sarès stât…
E cumò magari tu riscjis di bandonâlu, chel mont, di cuant che ti à sturnît chel maladet motopic… al jere rivât cussì dongje des tôs orelis… cuasi no tu sintis plui…ma la musiche e je la vite!
Fâle finide…
No. Tu âs cambiât idee… viert il gjornâl e jere une propagande suntune pagjine… al jere Mal… Mal, no mâl… Mal il cjantant… al veve un argagn inte orele… insome, e je ancjemò sperance…
di Checo Tam
#470
3 comments On In musica est vita
Bielzà prime di finîle o eri sigûr che tu le vevis scrite tu ancje se no veve nuie des storiis neris. Forsit parce che sule musiche o ti ai bielzà sintût fevelâ. Un salût.
Jaio
Le musiche e met e ligrie e Mal, se no mi sbagli in chê volte al purtave un reglâl: pinsîrs d'amôr!
Graziis! O sintarees ancjemò fevelà di musiche! CT