Tal curtîl dai Pontons dopo la prime vuere grande a jerin a stâ cuatri fameis, chê di Cico, chê di Bidin, chê di Fresc e che di Poltane.
Ducj a vevin la vacjute, cualchi cjamput e un stric di tiere par ort dongje il sacrosant gjalinâr.
Poltane nol veve nie, nancje pantianis a cori pes busis de puarte o sul solâr; ogni tant cualchidune e rivave in esplorazion ta panarie par dopo tornâ di dulà che e jere rivade plui magre e scuintiade di prime, cence contâ il risi di passâ jê par prodot alimentâr.
Poltane al veve imparât e po mantignût il vizi dal fum di militâr, ma jessint al vert al cumbinave cun cjarte di calendari che siôr Sisto ustîr i procurave man man che al disniçave i dîs.
In chest sfueut al rodolave la scusse masanade de vît di bacò tirade a bersò fûr puarte di cjase; nol jere paragon cul sigar toscan fumât sot naie, ma come che al dîs la detule, cuant che no je une gjaline bolide a ven buine ancje une çore.
Dentri dal gjalinâr di Cico lis gjalinis a cjantavin di spes a visâ dal ûf poiât, senochè a Poltane i passe pal cjâf di robâ i ûfs par cjoli spagnolets…
Si invie cussì te brute intenzion, scuindint il robât tra cjâf e cjapiel, ma stâ di fat che Cico lu suspiete de cjative azion… “Strani chel fum, strani l’odôr, plui strani poltane che al fume di siôr…”
Cussì scuviert l’ingjan al spiete il lari a un pas obleât, i da une manade disore il cjapiel fasint di chei ûfs un licôr di fertaie.
Dai cjavêi a la barbe fin ancje sul cuel cuvierzint la muse al puest da fressorie!
Cence savêlu cico e poltane, l’invenzion dal shampo la firmavin ta storie.
di Luciano Marinig iw3 qrc
#380
2 comments On L’invenzion dal shampo
Lussian, leiti l'è simpri biel. Le storie de nestre int e une biele ridade tu sâs simpri cumbinale. Brâf
Nelodi feagne
Ce biele furlanade! Biele ancje le rime. Dute da tignî cont.
Jaio