L’invasion

Paulin al cirive dispès la pâs de solitudin sentantsi cun frecuence sore il muret dal Sagrât de Glesie, come se al stes in spiete di alc che al dovarès sucedi. Di lì al viodeve ducj i moviments tal font de val. So nono Pauli, di solit, i contave sore lis invasions barbaris patidis a traviers des etis. Il Sagrât juste apont, al jere simpri stât un puest strategjic come vuaite par viodi il fâsi indenant dal nemì.

Ogni an, tal mês di Avost si ripeteve la stesse storie. Si ju olmave cuant che a cjapavin la rive sù, daspò de curve clamade de Madone. Cjalantju dal alt si viodeve il movisi di une masse eterogjenie di cjars tirâts da cjavalons grancj e grues, la lôr fuarce e vignive stiçade dal vosonâ gjenerâl, oms e bestiis a cirivin di puartâ in sigûr dut chel piçul e grant mont di fantasie cjamât sui cjaroçons.

Chel dì, un bâr di nui al taponave la culine, dabàs la brume e cuvierzeve la campagne. Paulin al associà dut chel movisi par nuie clâr ae fumate, imberdeant chel daidai cu lis contis dal nono, al crodeve di viodi avanzâ une marmaie barbare cun pichis e alabardis, volint a ducj i coscj espugnâ chel bastion invincibil. A confermâ cheste sô credince al fo ancje il fat che al sintì a berghelâ in forest (so nono Pauli al varès dit: in cravuat).

Par fortune un rai di soreli al slambrà i nui e al dissipà lis fumatis in sante pâs , il vert de campagne si rifleteve tal celest dal cîl. Paulin al viodè rivâ ben altri. Batint lis palmis des mans e cu la bocje vierte al cjalave chê vivarose, asimetriche e lungje carovane che varès puartât in paîs cuindis dîs di baldorie, di lusôr e di ligrie.
E rivavin lis gjostris.

• 

  ateliersommarti has written: 25 di Mai dal 2012 at 4:29 DM Reply

  Biele. Nissun di sig{ur se spietave cui baracons.
  A 'nd é alc ch'al tire sul siecul passât come s'al fos un film dai agns 50 e forsit chest al fâs plui tipic. Dutcâs, se nissun a lu dîs o cj'al dîs jo:-)
  • 

    Galliano has written: 26 di Mai dal 2012 at 2:41 DM Reply

    Graciis Jaio des tôs peraulis, al fâs simpri plasè savè di te.

    Galliano
• 

  Frank Spada has written: 3 di Jugn dal 2012 at 6:14 DM Reply

  Galliano… graciis de biele "L'invasion" che mi fat pensà ancje a Buzzati e a che atre robe mi ha musicat lis orelis tant di fami sturdì.
  Mandi e già co ses sot tiro duciis dos… un abrac ancje a Mario
• 

  OSCAR B. MONTOYA has written: 16 di Novembar dal 2012 at 11:10 PDM Reply

  Cheste conte e je stade lete tal 7º Incuintri di "SERADIS DI LETURIS FURLANIS", che si davuelzè te Societât Furlane di Buenos Aires ai 15 di Novembar dal 2012.