CorseCurteLui#14 – Une lagrime

#14 – Une lagrime

Si ben che al fos indenant cui agns, il Sovran al cjaminave svelt sul breâr di nûi de Cjamare. Al strissinave la vieste, movint polvar di stelis, cuntune ande rabiose.
La puarte dal Armaron e jere sledrosade. Picjade sul fondâl e slusignave la Grande Manarie, cul so mani piturât di ros e aur, doprade une volte sole centant timp indaûr. Tal so va e ven, il Sovran si fermave a cjalâle. Dopo al sbrufave e al tornave a balinâ malcuiet.
— Tu sâs a ce che tu vâs incuintri. Di sigûr no sarai jo a fermâti, ma visiti che cheste volte no tu podarâs plui tornâ indaûr!
La vôs de Femine e jere clare e sclete.
— No viodistu cemût che e son malsestadis lis tieris? — Al veve rispuindût il Sovran. — Vueris di ogni bande, angariis, prepotencis, sassinaments. La Umanitât e je sot la mace dal Finiment, bielzà pontade e peade a un spali clopadiç. Par jê al è segnât un brut destin!
— O sin stâts piês di cussì. — E rispuindè la Femine. — E pûr tu vevis lassât cori!
Il Sovran al jere scaturît.
— No! Tu stâs falant! Piês di cussì no sin mai stâts! Nancje no uçarai la Manarie! La moli jù di bot, sclesade e consumade, cence spiçâ la lame!
La Femine si jere tirade impins. Malapaiade, lu veve voglât e cence dî nuie si jere sfantade.
Restât bessôl, il Sovran al voleve cjalâ lis sôs tieris une ultime volte. Prest la Manarie e varès taçât il tres, sbregant la paradane. Cussì si sarès liberade la Grande Aghe, il Sglavin Eterni, che al varès netât dut, puartant vie oms, arbui e bestiis.
Al veve foropât un nûl e smicjât dentri. Un puntin si moveve.
Al jere un frut al coreve suntun prât, talpassant la jerbe. Al marcolave, al sgliciave, al sbrissave sui fros verts. Fintremai che al jere colât, ridint content.
Il Sovran lu cjalave.
Une lagrime intai siei voi.
Po dopo, tornât inte Cjamare, al veve sierât cun fuarce la puarte dal Armaron. La Manarie e varès spietât ancjemò.
Dal breâr dai nûi, intant, une ploie lizere e veve scomençât a vignî jù cuntun odôr di fresc.

di Massim Furlan (Sbreghebalon)
#1323

2 comments