Skip to content

Menu

  • Prime Pagjine
  • La Ostarie
  • Chei di Contecurte
  • Contis
    • Contis di scoltâ
  • In cjar e vues
  • Lenghe Furlane
    • Ator pes peraulis
    • Cemût si disial?
    • Cemût si zuial?
    • Cjançoncurte
    • Conte Misteriose
    • Contis Cence Cjâf
    • Ecumène
    • Ispirazions
    • Lets in Ostarie
    • Partidis di Discors
  • Contecurtârs
  • CorseCurte

Copyright Contecurte 2026 | Theme by ThemeinProgress | Proudly powered by WordPress

Contecurte
  • Prime Pagjine
  • La Ostarie
  • Chei di Contecurte
  • Contis
    • Contis di scoltâ
  • In cjar e vues
  • Lenghe Furlane
    • Ator pes peraulis
    • Cemût si disial?
    • Cemût si zuial?
    • Cjançoncurte
    • Conte Misteriose
    • Contis Cence Cjâf
    • Ecumène
    • Ispirazions
    • Lets in Ostarie
    • Partidis di Discors
  • Contecurtârs
  • CorseCurte
15 di Novembar dal 2010

La balene

Gjenar fantastic . Gjenar sociâl
Marcut e so barbe Pieri a jerin in pîts sul cei de strade e a cjalavin jù, viers le aghe verdone che e stralusive jenfri i morâi, su la cueste nord de mont.
La balene si rodolave mostrant la panze grisuline e sborfant, di tant in tant, une sclipignade licuide, ma che e someave fate di polvar, par trop che e jere dongje a jessi vapôr.
Marcut al pontave un dêt viers di jê e al riduçave, intant che so barbe al faseve di sì cul cjâf, freolantsi cuntune man il pêl grîs e ruspi che i cresseve sui smursiei.
Se no ju ves viodûts in chê posizion, Vigji no si sarès nancje fermât.
Al veve parchegjâde la machine a çampe, su la strade che di Tarnep e leve a Somblâc, cu lis cuatri frecis come che si conven a un gjornalist di rapine come lui. Al si jere metût in bande dal om vieli e dal frut, e al veve tacât a cjalâ cun lôr il lât di Cjavaç.
«’Sere.» al veve trabascjât, ma la peraule i jere muarte sui dincj, cuant che al veve viodût chel pes bocognon che al svuacarave intal mieç.
Al veve butade une voglade a chei altris doi, ma no si jerin nancje voltâts, e dopo al jere tornât di bot e sclop a sgarfâ tal cruscot par tornâ in ca cu la sô machine fotografiche.
«Mierde,» al veve bruntulât, traficant cui botons de digjitâl «o ai masse pôc zoom!»
Marcut alore lu veve cjalât, cuasi cun maravee.
«Che al cjali che se al vûl fâi une foto ae balene al pues lâ jù fin su le rive, di chê altre bande».
«Ma… ma…» al veve protestât Vigji, cence crodi ai siei voi.
Il pes, a voli di nâs, al sarà stât lunc vincj, vincjecinc metris. Al veve un mustic un tichinin a bec, e une grumbule plui scure su la schene, propit dulà che al vignive fûr il gjet di vapôr. In bande dal cjâf al veve dôs pinis lungjononis e la code, a forme di mieze lune, e jere ancjemò plui largje.
«Ma no je une b-balene. I somee, ma no si è mai viodût un pes compagn!»
«Ma sì, sì. Lu savìn che no je une balene, però i somee une vore e aromai la clamìn ducj cussì» al veve spiegât Marcut, come se Vigji al fos lui il frut.
«Ma bisugne clamâ i gjornâi! La television, i sienziâts!» al veve protestât chel altri, «E je une robe incredibile!»
«Mah. Se al è par chel jo e chei de mê classe la vin za metude su Youtube ancjemò chest Unvier».
«E no isal sucedût nuie?»
«Ma, boh. Tal imprin o vin vût une pacade di clics e a Gjelindo i è parfin rivât un assegn di Google par vie dai banner publicitaris, ma dopo al è saltât fûr un flame e la int si è stufade».
«Un ce?» al jere intervignût pe prime volte Pieri, fasint capì che al steve atent al discors.
«Une barufe in internet, barbe» i veve spiegât Marcut.
«E cumò?» al veve insistût Vigji.
«Cumò nuie, e sta li cuiete te aghe e no dâ fastidi a dinissun».
«E dute chê int, lâ vie? Ce fasie?»
«Cemût ce fasie? No viodial? A cjape il fresc dal lâc, veh!»
In chel, come a volê rispuindi ai dubis di Vigji, la balene e veve fat un salt sul pêl de aghe, restant par un marilamp in pîts su la code. Po dopo e jere colade jù, spanzant e sclipignant dapardut.
Un rivoc di batimans e ridadis al jere plovût jù de rive, dulà che une marmaie di int in costum e cjapave soreli, distirade sui suiemans.
Dopo di chê sene Vigji nol veve plui cjacarât.
«Bon, Marcut, sù. E ore di lâ» al veve dit Pieri, a un ciert pont, e cence spietâlu si jere inviât, a pît, viers Tarnep. La canaie i veve talpinât subit daûr, lassant une cjalade e un “mandi” a Vigji che, cu la digjitâl a pendolon sul pet, al veve rivât dome a vierzi la bocje, ma cence butâ fûr nissun sunôr, propit come un pes fûr de aghe.

di Rafaêl Serafin
#140
Tags: Rafaêl Serafin

7 comments

  • Anonymous has written: 15 di Novembar dal 2010 at 9:02 PDM Reply

    il lûc indulà che si ambiente le conte nol è lontan di Verzegnis e des sôs striis. Chel pes, che balene, ancje se sin te ete dal "Web", cuissà, che nol vedin parintât? Par me, je propit farine dal stes sac……. e mi fâs pôre

    Nello Malisano

  • Anonymous has written: 15 di Novembar dal 2010 at 11:58 PDM Reply

    Biele conte, veramentri. Scrite ben e grande idee che a ti ten lì a lei. Otime.
    Maurizio Mattiuzza

  • ILfurlanist has written: 15 di Novembar dal 2010 at 3:54 DM Reply

    Il mostri di Loch…Cjavaç. BIELE!

  • Gianfranco has written: 16 di Novembar dal 2010 at 9:06 PDM Reply

    Cence finâl a sorprese: conte di gale!

  • Barbara has written: 28 di Jugn dal 2016 at 2:10 DM Reply

    Il nestri ostîr nus cjape par man e nus imbarlumis cuntun contà che al è ancje film: scritôr, regjist e senegjatôr..e cuissà tropis animis intal furlan sec incantesemât, sganderlet (a Cjarlins) e speroâl (?)! Une vore biele, grassis!

  • gelo has written: 28 di Jugn dal 2016 at 7:27 DM Reply

    grassie!

  • Anonimo has written: 29 di Jugn dal 2016 at 5:37 PDM Reply

    A è une biele conte che ti imberdee dal postic al pardabon cun che facoltat moderne sostignude dal digjtal che ti fas viodi ce che no al è indula che nol po jessi. Lussian

Lasse une rispueste Cancele rispueste

La tô direzion di pueste eletroniche no sarà publicade. I cjamps domandâts a son segnâts tant che *

This site uses Akismet to reduce spam. Learn how your comment data is processed.

Libris

Tu Scrivarâs une Conte
La Stagjon des Contis
Cuviertine dal libri Lis Contis dal Mês
Lis Contis dal Mês

Scrivinus a contecurte[at]gmail.com

Jentre te Liste di Contecurte

I tiei dâts a saran mantignûts privâts e no saran condividûts cun altris. A saran doprâts dome par mandâti lis novitâts di Contecurte.

Cjale la tô casele di pueste (se al covente viôt ancje te cartele spam) par confermâ la iscrizion. Cence conferme no podin mandâti nissun messaç.

Dutis lis contis

Ultins coments

  1. Renzo Ciutto on CC26Novembar#09 – Internascional18 di Novembar dal 2026

    In chê volte il furlan al ere ancjmò doprât avonde e si podeve doprâ la lenghe ancje par la musiche,…

  2. Renzo Ciutto on CC26Novembar#09 – Internascional18 di Novembar dal 2026

    In chê volte il furlan al ere ancjmò doprât avonde e si podeve doprâ la lenghe ancje par la musiche,…

  3. Anonim on CC26Novembar#09 – Internascional18 di Novembar dal 2026

    In chê volte il furlan al ere ancjmò doprât avonde e si podeve doprâ la lenghe ancje par la musiche,…

A son passâts pe Ostarie

Adelmo Della Bianca Alessandro Valoppi Alessia Meacci Alessio Ecoretti Angelo Floramo Barbara Battel Bepi Zefon Carli Pup Cecilia Liva Checo Tam Christian Romanini cjadenedicontecurte Covidcurte Day Cristina degli Uomini Davide Peressoni Di Suald DoneBete Dree Venier Eduart Baschera Egle Taverna El Fari Eline Enrico Tomasi Eowin Fantacorsecurte Ferdinando Passone Francesca Giorgetti Franco Marchetta Franco Vigo Frank Spada Fuguline Fulvio Romanin Gaetan Cogôi Galliano di Buenos Aires Gianfranco Pellegrini Gianluca Franco Giuliana Pellegrini Guido Covàs Isa Dorigo Ivano Urli Jacum Tiburzi Jacum Trevisan Jaio Furlanâr Javier Moscufo L'Antescûr Laura Dri Laurin Zuan Nardin Lenart Gjavedon Leonore Lorele la Morete Luche Bagnarol Luciano Marinig Lupo Manarie Maghe Olstrele Marcello Marangone Marcelo Del Mestre Margarite Cogôi Maria Veronica Moscufo Mario Facile Marisa Gregoris Mariute Massim Furlan Massimilian Glîr Maurizio Di Fant Maurizio Mattiuzza Michele Vuardianut Calligaris Michêl Londar Milio dai cjans Nello Malisano Nene Furlane Noemi Salva Norma Romotowski O. Zete Pablo Gortan Passadôr Patrizia Torossi Pauli Fantini Pauli Jacuz Pieri Moràs Pierina Gallina Plume di Ingjustri Rafaêl Serafin Renzo Brollo Renzo Turùs Ricardo Gregoretti Ricart Tiburzi Rudy Citòs Sandri Carrozzo Scoltecurte Silva Ganzitti Spirt Anonim Stefano Gasti Stefano Lombardi Stiefin Asquini Stiefin Morat Stiefin Stefanut Stralunade Tiziana Novello Tommaso Pascolo Zorz Cesaratto

Gjenars di Contis

  • Gjenar di orôr
  • Gjenar Dramatic
  • Gjenar erotic
  • Gjenar fantasience
  • Gjenar fantastic
  • Gjenar ironic
  • Gjenar neri
  • Gjenar Par Fruts
  • Gjenar poetic
  • Gjenar politic
  • Gjenar poliziesc
  • Gjenar romantic
  • Gjenar sientific
  • Gjenar sociâl
  • Gjenar storic
  • Gjenar sureâl
  • Gjenar zâl

Amîs de Ostarie

  • Centri Lidrîs Furlanis
  • Comitât 482
  • Comitât Friûl
  • Divine Comedie par furlan
  • Dizionari Biografic dai furlans
  • Gnognosaurs
  • Internazionalitari
  • Leturis di ca da l’aghe
  • Lidrîs e Butui
  • Sociedad Friulana Buenos Aires
  • Sorestans e Sotans
  • Tiere dai Paris

Radio Onde Furlane

Par donâ il 5x1000 a Onde Furlane al baste meti
il codiç 02650850304 cuant che si compile la
declarazion dai redits.

Avertence

Chest sît, jessint inzornât cence nissune periodicitât, nol pues jessi intindût come un prodot editoriâl, intal sens de leç n. 62/2001.

Lis imagjinis publicadis a son cjoltis dal web, furnidis dai utents o de inteligjence artificjâl e a son stadis judicadis di domini public. Ducj chei che a podin svantâ dirits su di lôr e a vessin voie di fâlis gjavâ, a podin scrivi ae nestre direzion di pueste.

Prime di mandânus une conte us invidìn a lei la pagjine dai conseis.

Copyright Contecurte 2026 | Theme by ThemeinProgress | Proudly powered by WordPress