12 di Zenâr dal 2011

Ispirazions: La Joibe Grasse dal 1511

O sin rivâts ae tierce ispirazion par scrivi une conte a teme, la prime che us proponìn vie pal 2011. Chest colp o lin a tirâ fûr un fat storic che, ca di pôc, al finìs cinccent agns juscj juscj. Cemût che o vês let intal titul o fevelìn dal riviel de Joibe Grasse dal 1511, o sei la plui grande rivolte popolâr de storie furlane.

I ingredients par imbastî une biele conte a son une vore. Cun di fat, il riviel al nas dal incrosâsi di diviers elements. In plui des tensions sociâls che za di agns a jerin daûr a montâ intes campagnis furlanis, o cjatìn ancje la faide tra Strumîrs e Çambarlans, e il conflit in at jenfri la Republiche di Vignesie e l’Imperi vuidât di Massimilian I di Austrie. No si à po di dismenteâsi che il riviel al sclope propit intal vîf dal Carnavâl: une suaze che e somee fate di pueste par chel “mont sotsore” là che contadins e popolans almancul par cualchi zornade a deventin i parons dal Friûl.

Dut al partìs di Udin ai 27 di Fevrâr dal 1511 – o sei la zornade che e cole la Joibe Grasse – ma po il riviel si slargje a buine part de Patrie dal Friûl dulà che cetancj cjistiei e palaçs a vegnin cjapâts, metûts al sac e brusâts. Dut câs, par cualchi note storiche in plui o podês provâ a dâi un cuc ancje achì.

Cuntune suaze come cheste, e baste un tic di fantasie e lis contis a puedin deventâ milante e di ogni gjenar. No volìn però robâus il “mistîr”: nô us vin dade la ispirazion e cumò us tocje a voaltris di scrivi…

Ispirazion domandade

e rivade di Carli Pup

3 comments

Dame mit Fächer has written: 12 di Zenâr dal 2011 at 7:54 PDM Rispuint

L'an passât, in Fevrâr, tal mio blog, o vevi "liberementri tirât fûr da un articul di Francesca Tesei", cheste storie:
Vigji e Lucine
Vigj e Lucine e jerin cusins. Lui, Vigji Da Porto, leât ai Savorgnan Del Torre da bande di mari e je, Lucine Savorgnan del Monte, protagoniscj di un tragjic e infeliç amôr nassût tal mieç dal Carnevâl dal 1511. Un amôr impussibil par colpe da rivalitât tra lis dôs fameis, ai timps di une sanganade rivolte popolâr, la “crudel zoiba grassa”, dal 27 di Fevrâr di chel stes an.
La lôr storie, seont il professôr inglês Cecil H. Clough e sarès che che à ispirât a Shakespeare il drame di “Romeo and Juliet”.
I contrascj fra i Savorgnan e vevin dividût i doi zovins, che si jerin incuintràs ta un Palaç, ca nol je plui, in Place Venerio, subite dongje da Glesie di San Francesco e dal convicin convent, deventât cul timp prime ospedâl e cumò sede dal Tribunâl.
Une feride ripuartade ta bataie fra Cormons e Gradiscje, il 20 Jugn dal 1511, e veve costret Vigji a ritirâsi te so vile di Montorso Vicentino, dolà che tal ricuart corât da promesse d’amôr strete in segret cun Lucine, al veve componût une novele, la “Giulietta”.
Volte vie setante agns dopo, Shakespeare al lei la traduzion in inglês e, da cheste, al varès di vê tirât fûr la storie pal so drame.
Vigji, par resons di prudence politiche, di riservatece personâl e par non pandi la identitât dai personaç, al veve ambientât la vicende a Verone tal 1303.

http://donebete.splinder.com/tag/vigji+e+lucine
Jaio Furlanâr has written: 14 di Zenâr dal 2011 at 10:45 PDM Rispuint

A nd'é un Romeo e Gjuliete che a varessin di vignî fûr tai monuments di Udin se un progjet dal Coworking al và indenant. Ma a mi mi plasarès che pal joibe grasse cualchidun al lêti a picjâ il fuc li di chei politics che no an fat nuie di ce che a vevin prometût:-)
Jaio Furlanâr has written: 19 di Zenâr dal 2011 at 4:59 DM Rispuint

Oila, a proposit di Romeo e Gjuliete, vé achi un sito a pene vignût fûr che al propon di celebrâ l'amôr che chescj puem e pueme. Chest an al sarès il moment di impadronîsi di chescj doi furlans par dabon e di fâur plen di fiestis. Sperin dome che dut nol ledi in frice:-)
Il sito; http://giuliettaeromeoinfriuli.it/