Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
A ôr de scjale..
Za da timp Abêl al viveve tal prin plan de cjase dai paris. A voltis, sentât su la carocele, al rivave a ôr de scjale, al cjalave parsot, e di bot cun fastidi al zirave tornant indaûr.
Al ricuardave che zornade che i veve cambiât la vite, e di spes al pensave che nol doveve vêi molât il volant al amì, lu cognosseve come un amant des sfidis, ma aromai no si podeve fâ altri. In chê sere al veve fat lis scjalis come tantis altris voltis, al veve viert la puarte, un cîl neri come l’ingjustri cuviert di stelis cimiotis lu spietave, la gnot sabidine e prometeve ben, al jemplà i polmons cul so aiar fin.
Parcade a sotet al viodè la sô machine rosse metalizade, al saveve che jê e jere li e ancje al saveve che lu spietave. Al jere stât un regâl di so pari, un premi si po dî, par jessisi laureât tant zovin, al veve dut chel che si po imagjinâsi devant di se, zoventût, savê e cuant altri. Cidin si svicinà ae machine, jê, come une sensibile inamorade e tremà impiant i lusôrs dantji il benvignût.
Si sentà, le cjareçà, al metè lis mans sore il volant, al jere seneôs di mostrâ a ducj la sô biele rosse. La gnot, la serade e i siei amîs lu spietavin in discoteche, lis musichis stuzighinis a saressin stadis lis protagonistis de serade, e a varessin puartât i sens al parossisim…
Tal doman lis testadis dai gjornâi de domenie a ripuartavin:
“Tragjic incident te crosere che puarte in autostrade. Une machine rosse metalizade tal cjapâ la curve a alte velocitât e sfondà il parepet, colant disot. Un dai ocupants al è ricoverât in prognosi risiervade, ma purtrop chel altri… I carabinîrs a son daûr a indagâ…”
Tantis voltis Abêl, sentât su la carocele, al rivave a ôr de scjale, al cjalave parsot, e di bot cun fastidi al zirave tornant indaûr. Ma une sere si decidè, si fermà, cun la man drete al movè la manuele metintle in pont muart, al sierà i voi concentrantsi, daspò di curts moments si alçà sù, il pît diestri al tastà il prin scjalin e cence esitazion lu frontà, un a un chei altris a vignirin bessoi e al fasè lis scjalis come tantis altris voltis… Al rivâ dabàs, si zirà cjalant disore…
Si viodè sentât te carocele a ôr de scjale, cui braçs a pendolón e i voi sierâts. Al pareve che al stes durmint.
di Galliano di Buenos Aires
#690
6 comments
Lasse une rispueste
Dutis lis contis
Galliano, cheste conte e fâs pensâ ai tancj zovins che a lassin la scusse a mone vie. Cun dut ce che a bevin e cun lis porcariis che a cjolin, no si rindin cont che si sta un marilamp a finîle mâl. Dopo nol sierf a nuie a vaî.
O ai scrit ancje jo un alc sul argoment (L'apontament) e ancje inte me conte il finâl al è plui o mancul chel.
Dut câs tu le âs contade ben.
Mandi
Une biele conte Galiano,se le zoventut le doprass come terapie preventive, si salvaressin le vite un grum di lor. Lussian
Une prose scrite cu la plume di un poete..brâf Galiano. Bepi
une vore masse plene di veretâts, o soi cu lis lagrimis e mi ven di dîti dome brâf par cemut che tu contis la vite…
Galliano tu deventis simpri plui brâf.Cheste conte,oltri al so significât, e je une maravee.
Pauli, Lussian, Bepi, Barbara, Nello
Prin di dut graciis a ducj voaltris pes vuestris peraulis e dai preseaments tai confronts de conte. Par gno cont o soi sigûr, chel o fasin al è prin di dut un plasè personâl, scrivi e je une forme di manifestâsi viazant tal mont dai siums e de imagjinazion, ancje se cjapade de realtât.