20 di Jugn dal 2011

Gjoldiments forescj

Gjenar romantic

 

Al jere lât fûr su la terace ta chê frede gnot di unvier. Lontan a sparavin dai colps, segno che al mancjave pôc a la mieze gnot, ma lui si imagjinave che a fossin dai cjaçadôrs a sfidâ la criùre par trai a des bestiis di gnot. Di là de terace e jere la cjase dai faris cul toglât plen di gjambis di blave secjis e di fen. L’odôr i faseve un strani efiet: come di nostalgjie misturade a felicitât… i vignivin iniment i biei moments di cuant che al jere frut.
In alt la lune plene e dominave la gnot. Cualchi nûl isolât ogni tant i passave parsore e ator de sfere si formave un cercli colorât. E la lune, par un efiet otic, e sameave che e corès, cuant che invezit a cori al jere il nûl.
Si imagjinave di jessi no su la Tiere ma suntun altri planet e che chê li no fos une gnot ma une dì clare. Dulà jerial? Su Netun? Su Uran?
«No, tu sês su la Tiere, a cjase tô, al è l’ultin dal an e tu starâs ancjemò une volte a cjase!»
Cussì i diseve la vôs de cussience. E tancj altris pinsîrs i ziravin pal cjâf: dulà jerino i siei ex amîs e, soredut, dulà jerie la fantate more?
Al vierzè une butilie di spumant e al tacà a bevi. Al metè sù une cassete tal stereo. E jere une cassete cul cartonut de cuviertine neri cun scarichis blancjis a ûs un encefalograme cun tantis riis, une parsore di chê altre (in veretât al è un spettrografo di Fourier)
UNKNOWN PLEASURES
Cussì al jere scrit su la cassete. La vôs dal cjantant e jere malinconiche, disperade… la juste musiche par passâ un ultin dal an di bessôl.
E al continuave a trincâ e lis cjançons a vignivin fûr dal stereo e, une volte finide la cassete, lui le tornave a meti sù e ancjemò e ancjemò fin al cricâ da la dì.
No podevial restâ in contat cui amîs? No, no jerin come lui. No podevial fâ une prove di coragjo? Cjapâ sù la biciclete e te criùre di chê gnot fâ un pôcs di chilometros cence fanâl par rivâ tal paîs di chê fantate more?
Cui sa ce che e faseve. Si divertive, biele come che e jere, cuasi une hawaiane, amade di sigûr di tancj zovins.
No. Parcè fâ il mat? Parcè cori il riscjo di murî di frêt?
Miôr restâ a sintî la vôs di un muart che e vignive fûr di un piçul radioregjistradôr. Miôr restâ a tracanâ chel vinat di pôcs francs.
Une vôs i disè ce che al veve di fâ.
Come un autome lui al le daûr di chê vôs. Tun piçul cabôt a jerin lis sclopis di so pari cjaçadôr e tantis cartucjis. Al vierè la puartute e al cjapà sù une sclope, le cjarià… tant che UNE GNOVE ALBE E STAVE SFANTANT… ma cuant che al veve pontade la cane dal fusîl cuintri il cûr al sintì dentri di sè une altre vôs…
«Moviti, dordel! Mole dut e cjape sù la biciclete! Tu sâs ce che tu âs di fâ!»
Mieze ore dopo al jere za te place dal paîs de fantate more… al viodè lis vecjutis lâ a messe prime. Si poià sot di un tei e si indurmidì. Il scampanotâ di messe seconde lu sveà e cussì lui al jentrà in glesie e si metè intun banc des ultimis filis.
Cuant saressie rivade la fantate more?
di Checo Tam
#179

19 comments

  • Frank Spada has written:

    Biele Checo Tam, e un'atre volte o resti… "une hawaiane" e dopo "si metè intun banc des ultimis filis."

  • Anonymous has written:

    Parcè si metè intun banc des ultimis riis? Par restâ platât…
    In questo racconto c'è molto di vero… C.T.

  • Frank Spada has written:

    A l'è propit par chest co soi restat cul voli viart, e pardabon eh, e soredut par une golarine hawaiane a rosis, e pardabon dos voltis eh!

  • gelostellato has written:

    A mi mi plâs une vore il disc 😀

  • Jaio Furlanâr has written:

    Le conte mi a fat pensâ a une cjançon ungjarês intitulade Szomorú Vasárnap (Domenie nere) che forsite e varès stât miôr al puest di Unknown pleasures. Par chei che no le cognossin, lait achi http://it.wikipedia.org/wiki/Gloomy_Sunday le cjançon a jere cussí lancurôse che a jere stade proibide par vie dai suicidis che a sussitave.
    A mi fâs pensâ ancje a Jacques Brel che al cjantave di spes i soi amôrs pierdûts o mai avûts. Mi somee un grum intime e personâl che scuâsi o mi scusarès di vêle lete. Ma se il scritôr a le a scrite, dopodut, al é parcé che al voleve fâle lei.
    Ognidun di nô tal scrivi o tal lei o sin tributaris di ce chi sin o ce che i vin stât. Duncje o dîs ce chi sint.
    Sul furlan doprât o ai notât: "Lontan a sparavin dai colps" Che mi somee masse talian par no dîmi che forsit le conte a é stade prime scrite par talian e po voltade.
    Par spirt di savê e no par criticâ in tal ûltim paragraf o lei "Si poiò" indulà che jo o varès mitût si poià. Vêr o no vêr, diseitlu vualtris.

  • Anonymous has written:

    La conte e je scrite par furlan ma si base su di une poesie "prosade" scrite il 31 di dicembar dal 1982 dal autôr che mai al varès pensât che intal avignî lis emozions a saressin finidis in pasto a tutti intune ostarie virtuâl!

  • Frank Spada has written:

    Autor, o autoresse, al sares mior che cui ca l'hà i comands in man al obleassi i commentators a firmasi – pene l'epurazion dal fa!
    Contecurte e ha di essi clare e rispettose, se no ul piardi i clients che an voe di bevi doc e no misturis!!!

  • Contecurte has written:

    Ma no stâ jessi cussì intransigjent, dài 😉
    a part che nus sa tant che chel parsore al è ancjemò il Checo, e po, su dai, nol è cussì grâf 😉

    (Se al è il nestri famei, po, cul cjâf che al à, vin di perdonâi sigure di no jessisi firmât 🙂

  • Contecurte has written:

    poiò pensi che al jere une falope di batidure, par cumò o vin cambiât, salvo indicazions contraries dal famei. 🙂

  • Anonymous has written:

    O pensi che la bambole hawaiane e sarès plasude a un donnaiolo come Frank!
    checo Tam (viodistu che cumò mi soi firmâ?)

  • Anonymous has written:

    Ah ben, canae di un Checo, cumò nissun si fidarà di une triplete!
    Mandi
    Frank

  • Anonymous has written:

    Frank! Troviamci un giorno in centro per un bicchierino… un liquorino… 🙂
    Firmato non Diaz
    Ma Bon Checo Tam!

  • Sun Dru-thi has written:

    Biel e al lasè ancje un tic di sperance pal frutaçat..cuissà se riverà le fantate o se LA FINE ARRIVERA'??

  • Anonymous has written:

    Szomorú Vasárnap … la cjançon ongjarese sugjeride di Jaio le ai sintude… e je note soredut te version merecane come Gloomy Sunday (o ind ai scoltade chê dal complès merecan di "deathrock" Christian Death, cu la cjantante Gitane DeMone a la vôs). In efiets e larès benon ma sta di fat che l'autôr chê frede sere di invier al stave scoltant i JOY DIVISION, grop di un cjantant che si jere picjât…

    Checotam

  • Anonymous has written:

    La frase UNE GNOVE ALBE E STAVE SFANTANT naturalmentri no je ni altri che une cjançon dia Joy Division: NEW DAWN FADES!
    checo

  • Anonymous has written:

    Checo, vulin sinti une "cover" di GNOVE ALBE sunade da Francis and the Phantoms!

  • Anonimo has written:

    Cjar anonymous… mi displas X te ma li s Phantasimis no sunin plui

  • Anonim has written:

    Vuê si ricuardin i 39 agns de muart dal cjantant dai JOY DIVISION, Ian Curtis, un dai plui impuartants nons de musiche NEW WAVE… la conte si base su la scolte solitarie di un LP dai JD intune gnot di cetancj agns za fa…

Lasse une rispueste

La tô direzion di pueste eletroniche no sarà publicade. I cjamps domandâts a son segnâts tant che *

This site uses Akismet to reduce spam. Learn how your comment data is processed.