Il progrès

O sin tun timp dulà che lis robis a gambin plui sveltis de int ordenarie. E gambiadis che son masse di corse, la int ordenarie lis cjape cence fâsi domandis. E lei lis istruzions, e frache dulà che al va fracât e se nol sucêt nuie, ochei, no problem, e clame l’assistence a fracâ.
“No tu jentris te logjiche, no tu sâs un dret de filosofie dal computer” mi disin a mi, tal viodimi come un sturnel denant dal desktop cul mouse in man de bande stuarte, che po e sarès une pantiane evolude des pantianis ordenariis di une volte.
O soi restât indaûr pe strade. No ai tignût il pas. Pierdût il treno. E no soi il prin.

Mê none Miane Jacuç, in cont di logjiche e filosofie des robis, no rivave a intindi, puare femine, chê de television, persuadude in vite sô che, daûr dal veri, e fos propi la veretât spudade, int di famee e curtilants jentrâts in cjase a fevelâi a jê.
“Buinesere, fion” i diseve ogni volte al colonel Bernacca intent a fevelâi dal timp. E vaive tal viodi la zoventût, dopo ducj i flagjei des gueris, cjapâsi ancjemò a fusiladis tun film western.
“Macaco!” i cridave a gno fradi che di picinin, par fâle rabiâ, i sbeleave al pape stant che al diseve messe, sigure che il pape lu viodès.

La dì che a Gjani Cjasalot di Gnespolêt i àn metût sù il puarton gnûf, cul comant eletronic a distance, e je corude tal curtîl a viodi chê sorte di maravee ancje Mariute.
Gjani, impins, cu lis gjambis a larc tal mieç dal curtîl, il telecomant in man daûr il cûl, e cun sô mari dongje, “Cjale, mame” i à dit.
“Cancello, apriti!” dissal lui, e il puarton eletronic al à tacât a vierzisi dibessôl, biel planc.
“Cancello, chiuditi!” dissal Gjani al puarton che par meracul alore si è sierât, cun Mariute sberlufide tal curtîl, che i vignevin jù lis lagrimis e dopo e je corude svelte a visâ il plevan.

In agns che tes cjasis e veve començât a cjapâ pît la radio, Bepino Fantin, che a Sante Marie i disevin Scopio, al à fat un cors par corispondence e cussì la int i puartave a lui “i aradios” di comedâ, cuant che a sgrasaiavin masse. Scopio sì ve che al jere al pas cui timps!
Ma une dì, che une radio lu à fat deventâ mat, le à cjapade sù tal braç, al è lât fuarce di vitis fin sul cjast e le à butade fûr di un barcon intal curtîl. Trê plans di scjalis al à fat, par fâsi passâ il gnervôs, cuntune radio che e pesave plui di un sac di blave.

di Ivano Urli
#937

1 comment