L’ultin pinguin

Plevan di Sante Marie, tai agns cincuante sessante dal Nûfcent, al è stât pre Domeni Paschini di Verzegnis. Al veve insegnât gjeografie tal seminari di Udin e il so studi al spicave tes gjitis inviadis cu la int dal paîs, a viodi il mont.
Biel planc, si meteve il pît fûr de miserie in chei agns, ma distès no jerin bêçs di straçâ in gjitis e alore cun Paschin si leve in coriere pal Friûl a viodi santuaris, rivant, la plui lungje, fin aes Dolomits, zire e volte pes stradis di chei agns, un pôc preant e un pôc scoltant il predi che, di babio professôr di gjeografie, par ordin al nomenave i lucs, trop altis lis montagnis, trop luncs i flums e trop insot i lâcs.
I fruts si vuadagnavin la gjite cui ponts ingrumâts a servî messe o tal puartâ la crôs e i lanternins pai funerâi. La gjite e jere une ocasion cetant spietade di spindi di bessôi la paiute, tirade de mame la matine, se mai ur ves coventât di comprâsi alc in chê zornade fûr dal ordenari.
Une sere, fermade la comitive a Auronzo, a disgropâ i zenoi, bevi e disbevi alc, biel tornant in ca di une gjite fin a Cortine, Dusuline e viodeve che Tunin Avost, seri seri e tai fastidis, al balinave fûr e dentri di une ostarie.
“Ce sucedial, Tunin?” i disè Dusuline.
“No sai ce cjoli” dissal Tunin.
“Trops bêçs âtu di spindi?” disè jê.
“Cincuante francs” dissal il frut.
“Cjol un pinguin” disà jê, un di chei gjelatos vistûts di cjicolate e tignûts par un stecut, che a vignivin juste un cincuantin.
“A ’nd ai za mangjâts nûf” dissal lui, cui cinccent francs che la mame i veve dâts pe gjite.
“Mangje ancjimò un” disè jê, che il frut no le à lassade nancje finî di conseâlu, corint content a cjoli l’ultin pinguin de gjite.

di Ivano Urli
#908

2 comments