Che dire? Letta tre volte, e non basta mai. Bellissima conte, profonda drammatica risolutiva.Grazie per la canzone di Tom
Il mont intune gnove ete
Rino, sentât come ogni dì su la stesse cjadree, si cjalave intor, pierdintsi cui vôi in chês machinis ch’a jemplavin la stanzie. L’ordenadôr su la scrivanie al faseve di paron, cun in bande une stampant. Nol mancjave l’I-Pad e une schirie di telefonuts e ordenadôrs che in vincj agns al veve cambiât.
Jenfri chei mûrs si contignivin dentri ducj i ordegns che, in mût simbolic, a marchin la gnove modernitât.
Di vecjo, al restave suntune cjoce poiade sul mûr, une pile di libris cuvierte di polvar, dongje un cuadri cu la fotografie in blanc e neri di Berlinguer e di un Crist di len mangjât par di plui dal carûl. Imagjinis di altris timps, indulà che chei oms, prime un e dopo chel altri, tantis voltis insiemi, cu lis lôr peraulis, sperancis, lu vevin striât; e cumò lontanis, scanceladis, glotudis des gnovis modis, da tecnologjie, des maraveis di internet, de inteligjence artificiâl, dai robots cun tant di voi, braçs e mans, bogns di butâ fûr un tratôr di bessôi.
Il mont al jere propit cambiât e ancje te vite de int di ogni dì. Lis pussibilitâts a jerin tantis, e ancje Rino, de sô piçule stanzie, dome cun dôi dêts, fracant su la tastiere, al podeve viodi e fevelâ cuntune femine mai cognossude, che cence vergogne, cu lis tetis di fûr, lu tratave dal tu; lu stes, cui voi, al podeve rivâ su mârs, monts lontans miârs di chilometris; torzeonâ a tor pal planet, magari rivant fin a Moscje e di chê capitâ in Americhe.
Di sigûr, chês gnovis tecnologjiis, deventadis une gnove religjon, a vevin savoltât il mont.
Une gnove Babêl, o il Paradîs sù la tiere? Cuissà? L’uniche ciertece e jere che la umanitât, cundut Rino, e jere jentrde intune gnove ete.
Intun secul di ilusions, indulà che pardut, al someave di jessi a sagre. Dome une robe no jere cambiade: i siôrs, che a deventavin simpri plui siôrs.
Là di fûr, intant, in chê zornade, un burlaç cun lamps e tons, cundute la sô furie, al pareve che al puartàs vie dut il paîs, intant inte stanzie si jere distudade la lûs cun dut l’ordenadôr.
Rino, spaurît di chê burascje, cu la ment si jere slontanât di chel mont visionari, che tant lu inceave: cul pinsîr al jere tornant inte vite vere, pensant a so fi disocupât, a une saete, che di un moment a chel altri e varès podût copâlu; a chês robis veris che pardabon a fasin bati il cûr.
E cjalant chel Crist e chê imagjine in blanc e neri picjade sul mûr, come intun salustri i sbrissave vie sot i siei voi cun dute la sô potence, chel vecjo mont che al veve dismenteât.
di Nello Malisano
#767
6 comments
Lasse une rispueste
Dutis lis contis
Lu savîs, no stêt dî di no. La disperazion di chês mans che no san ce fâ cuant che un burlaç us gjave la curint… e magari il telefonut al è ancje scjamât. La ete di cumò, che inte curint a somee vê il pan, e je une ete strane. Tant di bon, ma no dut al è bon. E Nello, cu la sô piçule storie, nus bute une lûs par fânus pensâ un moment.
Al’è tornât Nelo che minusiôs intal spiega lis robis, nus presente chest mont moderni ,che parelât a di chel di îr da bande di un vieli, nus discjame une realtât indiscutibile, indulâ che le facoltât virtuâl nus met fûr cumierie cu le crodince di jessi dentri, ma indulà che il cûr nol crôt.Compliments a Nelo e a le so abilitât di messeda le pene a disponi ingjustri su cjarte seont buine ment comande. Mandi Nelo. Lussian
Brâf Nello.
A mi mi passe tant che a Rino. Cuant che mi mancje la corint eletriche in cjase, ancje se e je une di chês zornadis meridionâls plenis di soreli, mi par che il mont si scuris al mancjâmi ducj chei tramais eletronics. Cemût fasevino une volte? Si fevelave di plui cul prossim!!, si zuiave une partide di cjartis!!, si leieve un bon libri!! Tal gno câs o cjapavi sù l’armoniche… e vie indevant. E cumò o sin sotans de modernitât, cui sa ce co larin a viodi ancjemò. Mandi
Gracie ancje ti Lussian. Lei i tiei coments, par me, al è simpri un plasè, par no dî un lus.
Compliments a Nello,
une vore biele e significative cheste conte che nus fȃs rifleti.
Dulà nus puartie cheste realtȃt virtuȃl , chest gnȗf mont che noaltris o cjalìn cun maravee ? Là che l’om si piert e forsit al à pȏre di pierdi la sȏ anime.
Egle T.
Gracie Egle e gracie Galliano pai compliments. Vere, si cjatin ogni dì sot i voi, un vêr ribalton e che nissun al sa indulà e in ce strade che ûs puartarà. Intune societât , forsit, libare de fadie dal lavôr, plui juste e cence vueris? Al dipendarà dai oms e des feminis, magari cussì no malâts di narcisisim e cu la voie di jessi simpri un plui potent di chel altri.