ScueleCurte_LengheForeste10: Di terra e di vino

Cjârs students, il vuestri gnûf insegnant di Lenghe Foreste e domande scuse pal ritart e al ringrazie il suplent pe pacience, e us propon in cheste prime lezion lis peraulis di un personaç une vore interessant, furlan “doc”, zovin e autôr pardabon di cognossi. Al si clame Matteo Bellotto. Lu scuviarzìn traviers di un romanç straordenari che al à scrit cualchi an indaûr. “Di terra e di vino” al è definît “romanzo friulano”, e la definizion une vore sclete e cole a pinel.
Cun chest libri a si pol fâ un viaç intes profonditâts dal Friûl, fintremai ai confins, dulà che il cidonôr des personis e la vôs dal vin si pandin framieç des campagnis e des ostariis.
Une famee operaie e contadine come tantis, il tornâ dal fi de emigrazion, il saltâ di gnûf dentri chei rîts di paîs che e metin adun gjerarchiis umanis e usancis ancestrals, a son lis tematichis de fonde.
Il vieli Boga, barbe Baldo, Toni, Dalila, lis Infinîts, Elvira, il predi Amato, Tarcisio, il Bar Vittoria, il paîs di Turcli e i tancj paisaçs e lis gjeografiis che a popolin lis pagjinis dal libri, nus tornin indaûr un microcosmi di animis dulà che ogni robe e sucêt cussì che nuie e podi sucedi, dulà che il contrast jenfri memoriis familiars, storie popolâr e presint moderni e puartin viars un dut ch’al cambie par no cambia par nuie, dulà che la volontât e je chê di restâ coerents ancje se il mont al va di une altre bande, no impuarte di ce bande. Bellotto nus done un ritrat leterari magjistrâl di cui e di cemût che o sin stâts e di cui e di cemût che sin; une voglade che e partìs des lidrîs de nestre tiere, dulà che il vin al comande. “Di terra e di vino” al è il romanç di ce che masse dispès il Friûl nol vûl cjalâ, di ce che i paîs no àn plasê di contâ; il romanç dal Friûl di vuê e di îr.
Intune poesie scrite intun altri libri, Matteo al dîs: Tâs / Spete / Bêf / Va a vôre / No stâ ridi / A ti va ben a ti // Lasse pierdi // No vâl la pene // La veretât / A je sot das peraulis.
In chestis riis si pues cjatâ un grum di elements interessants par rifleti e scrivi di un Friûl di cheste fate, contât dal autôr.

Materie: Lenghe Foreste
Mês: Otubar
Prof: V. G.

1 comment