Il crucifìs carulît

Mê agne Tilie e jere partide par Rome di fantate a servî pes cjasis di siôrs, fasintsi subit preseâ pa l’impegn ch’a meteve tal so lavôr. E rivà a jentrâ tal palaç dai princips Torlonia, dongje dal Vatican, dulà che si fasè subit benvolê stant cun lôr par plui di cuarante agns. Jê e veve cussì tant afiet pal so lavôr, ch’e e veve parfin rinunziât a fâsi une famee, restant vedrane. D’Istât e rivave a fâ un scjampon in Friûl par une setemane e la passave simpri a cjase nestre. Mi voleve ben e mi à simpri clamât Paulino, ancje cuant ch’o vevi plui di sessante agns.

Ven a stâi che agne Tilie, dongje i setante, e scugne molâ e il princip, ch’al veve la cjase plene di cuadris, statuis e mobilie antighe e al jere tirât come ducj i siorons, come buine jessude, invezit di bêçs, che a mê agne i varessin fat plui comut, i de un crucifìs di len dut carulît. “E’ molto antico sa, e vale parecchio!” i veve dit il princip, cun muse rote. I zonte ancje che lu veve puartât di Costantinopoli so bisnono, dulà ch’al jere stât ambassadôr pal Vatican, plui di un secul daûr.

Cuant che agne Tilie ven a mancjâ, par test mi lasse il crucifìs e cumò al è picjât tal ingrès di cjase mê, a fâ biel voli.

Vuê al ven a cjatâmi Remo, un vecjo amì chi no viodevi di un pieç. Remo al fâs il marcjadant; al compre e al vent di dut e al è une bolp tal so lavôr. Al rive simpri a fâ ‘ne biele creste sui afârs ch’al fâs.

Lu fâs jentrâ e lui, olmât subit il crucifìs picjât tal mûr: “Biel chest crucifìs!” al tache, e jo i fâs presint di ce bande ch’al ven, ch’al è ne vorone antîc e al val ‘ne vore. Lui, interessât, al vûl savê alc di plui e alore i conti che lu ai fat viodi al plui nomenât anticuari di Vignesie, ch’al voleve che i al vendès a ducj i cosçj; mi varès dât milions, ma jo no lu ài molât; al è un ricuart di mê agne. E Remo, simpri plui interessât: “Ma di ce epoche esial?”; “No pues dîtal” fâs jo, sustignût, “Sa si ven a savê, di sigûr mal puartaressin vie”. “No stâ preocupati, o soi come une tombe; dîmal” fâs Remo. Juste par contentâlu idîs, sot vôs “Al è dal setante devant Crist”. Remo l’è scaturît; “Usti!” i scjampe serio, e par un marilamp al pense a ce ch’al podarès saltâi fûr. Po al’à un salustri e al sbroche: “Ma va in mone!”, e jù a ridi ducj doi.

• 

  Barbara has written: 22 di Lui dal 2016 at 7:02 PDM Rispuint

  …cuant che si sa a contâle …e je une vore super la storie devant o daspo Crist che sedi!
• 

  Giovanni Nello Malisano has written: 22 di Lui dal 2016 at 9:00 PDM Rispuint

  Pauli, ma isal il Crist che tu us vevis contât a Listize al contecurte day? Ma lu stes lis tôs contis al è simpri biel leilis Pecjât che Lussian nol pues lei cheste chi. Si è brusât l'alimentadôr dal so ordenadôr.
• 

  Anonimo has written: 22 di Lui dal 2016 at 10:41 PDM Rispuint

  Crist in crôs prin di Crist, cui la varessie pensade! Cuissà ce tancj anticuariis ch'a fasin i bêçs in chest mût. Ce biel scrivi ch'a tu âs, Pauli, chest al è il vêr furlan natîf, Bepi