LCPBDM #1.3 – A spas cul cjan

@annalauraart

Tu âs trente agns, an plui an mancul. Ma ti clamin ancjemò ragazza, ancje se dispès ti tratin di femine, cuant che al è di barufâ par une bolete o decidi i turnis sul lavôr, soredut di cuant che tu sês lade a vivi di bessole.

O miôr, di bessole tal imprin, ma dopo tu âs cjatât un murôs. Un murôs-murôs, a disevin lis tôs amiis, par capî se e jere une robe diferente. E al jere cussì, sì, al jere un murôs-murôs. E o vês vivût insiemi… par trop? Un an e mieç? Forsi doi. No tu âs mai tignût cont dal timp, dai aniversaris, compleans. E nancje dai oraris o di ce che e pense la int, se al è par chel. Tu sês une di chês fatis cussì, tu, che a cressin pôc e par sante scugne. O almancul tu jeris cussì prime di lui.

E no ti è displasût cambiâ. No. No tu puedis dîlu chest, nancje cumò che al è dut finît e ti pâr di vê butât vie alc, dal timp, forsit, o forsit alc di te. Ma tal imprin no ti jere displasût. Lâ a durmî tal jet cence murî sul divan cun telecomant su la panze… mangjâ sentâts in taule… lavâ la robe par ordin cence fâ un grum su la cjadree… o puartâ fûr la Kira a oris cuietis, e no cuant che ti zire a ti…

Eco, la Kira. Vuê tu jeris cussì cjapade mâl dal jessisi lassâts ben che no tu le âs puartade nancje fûr. Ce ore ise? Saran cuasi dôs… No. Trê. Lis trê di matine. No son oris di… No. Parcè? Parcè chê frase tal cjâf. Al jere lui che al varès dite une robe cussì. Kira, ventu? E jê e je za che e mene la code, su la puarte. Tu cjapis sù il tacuin, un telefonut cence notifichis, i airpod. Il paîs al è vueit, clare. Tu ti inviis. L’aiar al è fresc, il pas al va, Kira e cjape il to ritmi. E je une lune che se no je plene pôc i mancje. Alc ti si disgrope dentri, come se un toc di te al ves tornât a cjatâ il so puest. Tu inviis une playlist a câs, e tu tachis a cjaminâ a timp cu la prime cjançon che tu scoltis…

Bielone. Perfete. La cjançon plui biele dal mont…

go steady, TENDER, FLUX (2024) 3’57”

Cheste cjançon e je avonde gnove di pache. Lôr si fasin clamâ TENDER, scrit in maiuscul, e il disc jessût al è dal 2024 e si clame FLUX. Lôr a son doi, e al è clare che a son malâts di sinth, ma in chest câs la malatie e puarte fûr lavôrs di chei che tu ju scoltis intant che tu fasis altri, e a rivin adore a meti un tic di clip intes criùris de eletroniche. La cjançon si clame go steady.

1 comment