LCPBDM #1.1 – I lavôrs di cjase

@annalauraart

Tu sês cjase di vore. No je domenie, no je une zornade di fieste. Ma tu sês cjase di vore, par un câs, par un parcè che al è capitât e tu sês contente che al sedi capitât. E fûr e je une biele zornade di Vierte. Il ronâ di chel a stâ dongje di te che i da di vene cul seecisis no ti dâ nancje fastidi. Anzit… ti rive chel odôr di jerbe pene taiade e no ti interesse, par une volte, che al sedi un alarmi e un vuicâ di pôre. Ti va di jessi egoiste, par vuê. In ciertis zornadis al capite cussì.

Tu âs za decidût ce che tu fasarâs, tal dopo misdì. Une cjaminade pai cjamps, un zîr in bici par lâ a bevi aghe frescje intune font di risultive, e un libri di puartâti daûr e di lei tal mieç dai prâts, cu lis mariutinis che za a van a torzeon e i moscjins che a àn ancjemò di saltâ fûr.

Ti mancje dome di fâ un pâr di lavôrs in cjase, par lassâ dut a puest, stant che tu sês di chês personis che a stan miôr cuant che a lassin la cjase in ordin. Ma i lavôrs di fâ a son pôcs, lizêrs, nuie che al costi masse fature e soredut, nuie che ti robi masse timp. Scovâ par tiere, spacâ la tavaie, meti vie la massarie za lavade e un pocjis di cjartis e scovacis, di chês che si ingrumin simpri sul mobilut, dongje de jentrade.

Cussì, prime di tacâ tu impiis la radio e e partìs la cjançon plui biele dal mont…

PILOT, The Notwist, Neon Golden (2002) [4’ 28”]

Cheste cjante plui biele dal mont e je di un grop todesc che al à tacât cu lis ghitaris ma al è passât in curt ae eletroniche. Al ven dal lôr disc plui biel, NEON GOLDEN, dal 2002 e di chel disc al è dal sigûr jenfri i tocs plui biei, ma se o vais a scoltâlu forsit o cjatarês altris, ancje se al reste un album che al è miôr intîr che fat a tocs. Lôr a son The Notwist, il toc al jere PILOT.