LCPBDM #1.2 – Sot dal rôl

@annalauraart

Tu sês un fantacin di 15-16 agns, forsit ancje 17, li ator. E no tu sês come la plui part di chei de tô etât, che lis dôs robis che si incjastrin simpri intai discors a son fatis di ce che al zire ator a di un balon o a di un motôr. A ti ti plasin i arbui, massime chei grancj, e il bosc, cu lis bestiis che al à dentri.

Ma in chescj timps ca, al è alc che ti plâs di plui dai arbui. E je di tierce B, si sês mandâts cualchi bilietut. Di cjarte, parcè che ti pareve biel, miôr di un messaç sul telefonut. Da rest no tu sâs nancje il so cognon, no lu à metût ni su tiktok, ni su ig. Tu i âs dite che ti plasarès puartâle a viodi un prât, un prât che tu cognossis, dongje dal parc che si va a passâ i daspò misdì. E magari puartâsi vie alc di mangjâ, lis biris, ancje alc di fumâ, ma chel no tu jal disis. No tu pensis che ti disi di sì, e invezit ti à dit di sì. Cussì tu puartis ancje la casse, la JBL gnove che ti è costade metât dai bêçs che tu vevis in bande. E une sfilzade di butâ su la jerbe. Si metês tal mieç dal prât, ma nancje sentâts si sa ben cemût che e je la sfighe: al tache a sbivicjâ.

Anin là sot, tu i disis, e si cjatais sot lis ramis di un rôl che al à almancul 4 voltis la tô etât. Tu lassis che si coneti jê a la tô casse cul so spotify cracât. Scolte cheste, ti dîs jê. E je robe vecje, le scolte gno fradi, ma cheste ca e je bielone. E a ti no ti plâs la robe vecje, no ti plâs la robe sunade. A ti ti plasìn i sunôrs di cumò. Ma ancje chest tu tal tegni par te.
Sintìn, tu i disis, intant che si poiais ducj i doi spale cuintri spale e schene al tronc. Al tache a plovi un pôc plui fuart, ma no sot dal rôl e di lontan il cîl al è za che al sclarìs.

Jê e frache play, e e partìs la cjançon plui biele dal mont.

LANDSLIDE, Smashing Pumpkins, Pisces Iscariot (1994) 3’10”

Cheste cjante plui biele dal mont e je pardabon viere. 1994, la vôs e je facile di cognossi, e pûr e je une vôs che no tu i disaressis mai di cjantâti alc di dolç. Il disc al jere un mancul cognossût, fat di ratatuis dai prins lavôrs e cun chei sunôrs li, un pôc grunge un pôc acits. Lôr a son i SMASHING PUMPKINS e a varessin spacât il mont trê agns plui tart cun Mellon Collie e blablabla. Ma come intun scansel sbandonât o cjatais cheste LANSLIDE, toc di Pisces Iscariot, che nol è dal sigûr facil di scoltâ par câs… al tocje lâ a cirîlu.